Súr et qosylǵan naýryz kóje qalaı daıyndalady
PETROPAVL. KAZINFORM — Naýryz kójeniń ortaq máni bir bolǵanymen, ony daıyndaý tásili ár óńirde ártúrli. Petropavl turǵyny Alma Jaısanova ulttyq taǵamdy anasynan úırengen dástúr boıynsha 30 jyldan astam ázirlep keledi.
Alma Jaısanova oblystyq balalar aýrýhanasynda uzaq jyl medbıke bolyp jumys istegen. Ol naýryz kójeni toqsanynshy jyldardan beri úzbeı daıyndap keledi.
Onyń aıtýynsha, bul taǵamnyń qatyp qalǵan naqty retsepti joq — ár otbasy qalaýyna qaraı túrli dám qosyp daıyndaıdy. Eń bastysy ol jeteýden kem bolmaýy tıis.
— Naýryz kóje úshin qazanǵa eń aldymen soǵymnan saqtalǵan eń dámdi músheler — qazy men shujyq salynady. Bizdiń óńirde kóktem kelip, shybyn-masa shyqpaı turǵan kezde etti súrleý dástúri bar. Sol sebepti kójege kóbine qaıyńnyń tútinine ystalyp, sap-sary bolǵan súr et qosylady. Mundaı et taǵamǵa erekshe hosh ıis pen dám beredi, — deıdi Petropavl turǵyny.
Naýryz kójege qosylatyn dámniń árqaısysynyń ózindik máni bar. Alma Jaısanova kójege aq mol bolsyn degen nıetpen aıran men qurt qosady.
Bul — mal basy kóbeıip, qoı qozdap, sıyr buzaýlap, tólimiz mol bolsyn degen yrymmen baılanysty.
Al astyqty aımaq bolǵandyqtan kójege kóbine tary, bıdaı nemese arpa jarmasy qosylady. Bul kójeni qoıý ári qunarly etedi.
— Men kójege arpa dánin de qosamyn. Qazaq uǵymynda baılyq pen bereke eń aldymen nannan bastalady. Nan — aq dastarhannyń kórki, molshylyqtyń belgisi. Budan bólek kúrish pen tary qosylady. Tarynyń da qazaq dastarhanynda orny erekshe. Aqtalǵan tary, jent, maısók sııaqty kóptegen dástúrli taǵamdar osy dánnen daıyndalady. Sondyqtan kójege tary qosý — jyl boıyna dastarhannan dám ketpesin, kóktemde ekken dán mol shyqsyn degen tilektiń belgisi. Nátıjesinde naýryz kóje qoıý ári toıymdy bolyp shyǵady. Naýryz kóje ishken adam jyl boıy toq júredi degen yrym bar, — deıdi Alma apaı.
Taǵy bir erekshe dástúr — naýryz kójeden aldymen kórshi-qolańǵa aýyz tıgizý. Bul — bereke men tatýlyqty, kórshimen syılastyqty bildiredi.
Búginde zeınet demalysyna shyqqan Alma Jaısanova ulttyq dástúrdi qadirleıtin otbasynda tárbıelengen. Onyń ata-anasy qolónermen aınalysqan eken.
— Ákem qaıys pen kúmisten at ábzelderin daıyndap, tapsyryspen arba men shana jasaǵan sheber bolǵan. Anam da keste tigip, quraq kórpe quraǵan. Osyndaı tálim-tárbıe alǵannan keıin biz de ulttyq salt-dástúrdi saqtap, keıingi urpaqqa nasıhattap kelemiz, — deıdi Alma Jaısanova.
Buǵan deıin Aqmola oblysynda «Naýryz qupııalary» ınteraktıvti kvesti iske qosylǵanyn jazǵan edik.