Sýpermarkette nemese saýda ortalyǵynda júrgende neni bilý kerek

ASTANA. KAZINFORM - Jyl saıyn sýpermarketter men saýda ortalyqtaryna suranys artyp keledi. Alaıda onda jaǵdaı jaıly bolǵanymen daý týdyratyn máseleler de joq emes. Mysaly, qaýipsizdik qyzmetkerleri sómkeńizdi arnaıy uıashyqqa qaldyrýdy talap etedi nemese sómkeni ashyp kórsetýdi suraıdy. Bul talap qanshalyqty zańdy?

Birinshiden, «Tutynýshylardyń quqyqtaryn qorǵaý týraly Qazaqstan Respýblıkasynyń Zańy (24-bap) azamattyń taýarlar men qyzmetterge erkin jáne qaýipsiz qol jetkizý quqyǵyn bekitedi. Bul satyp alýshy saýda zalyna jeke zattarymen, ıaǵnı sómkemen, rıýkzakpen erkin kire alatynyn bildiredi.

Zańnyń eshqandaı normasy olardy saqtaý kamerasyna tapsyrýǵa mindettemeıdi. Eger kúzetshi sizge muny usynsa, óz erkińizben kelisken jaǵdaıda ǵana zań sheńberinde áreket etedi. Mundaı jaǵdaı QR Azamattyq kodeksiniń 39-taraýynda, «Saqtaý shartymen» retteledi. Al 380-bapqa sáıkes kez kelgen shart ózara kelisim boıynsha jasalady.

Kóbine shyǵarda kúzetshi sómkeni ashyp kórsetýdi suraıdy. Alaıda bul talap emes, sypaıy ótinish qana jáne siz bas tartýǵa tolyq quqyǵyńyz bar. QR Ákimshilik quqyq buzýshylyq týraly kodeksine (QR ÁQBtK) sáıkes, 16-bapta jeke tekserý jáne zattardy tekserý tek ákimshilik quqyqbuzýshylyq jasalǵan jaǵdaılarda ǵana, tek ýákiletti organdar, ıaǵnı polıtsııa qyzmetkerleri tarapynan júzege asyrylýy múmkin. Sonymen qatar, mundaı is-sharalar beınejazbaǵa túsirilip, mindetti túrde hattama toltyrylýy kerek (QR ÁQBtK 791-babyn qarańyz). Kúzetshi sizdi ustap alýǵa da, tekserýge de quqyly emes. Kúzetshi polıtsııaǵa qońyraý shalyp, onyń kelýin kútýi kerek.

Kúzetshilerdiń ókilettikteri «Kúzet qyzmeti týraly» QR Zańymen qatań rettelgen. 1, 3 jáne 4-baptarǵa sáıkes, kúzetshiler qaýipsizdikti qamtamasyz etedi jáne múlikti qorǵaıdy, biraq bul rette azamattardyń quqyqtary men bostandyqtaryn buzýǵa quqyǵy joq. Bul olardyń jeke tekserý júrgizýge, tintýge, zańdy negizsiz kúsh qoldanýǵa nemese qozǵalys erkindigin shekteýge quqyǵy joq ekenin bildiredi. Kúzet qyzmetkeriniń ókilettigin asyra paıdalaný QR Qylmystyq kodeksiniń 252-baby («Jeke kúzet uıymy qyzmetkerleriniń ókilettigin asyra paıdalaný») boıynsha qylmystyq jaýaptylyqqa ákelýi múmkin.

- Eger sizdiń quqyqtaryńyz buzylǵan bolsa, sabyrly ári saýatty áreket etińiz. Zańsyz talaptardan sypaıy túrde bas tartyńyz, polıtsııa shaqyrýdy usynyńyz. Ne bolyp jatqanyn beınejazbaǵa túsirip alyńyz nemese kýágerlerdi tartý arqyly tirkeńiz, sodan keıin sýpermarket ákimshiligine shaǵym túsirińiz nemese jergilikti polıtsııa bólimine júginińiz, - dep keńes beredi QR Saýda jáne ıntegratsııa mınıstrligi baspasóz qyzmeti.

Osyǵan deıin, sýpermarket pe, bazar ma? Qazaqstandaǵy saýdada kim nege mán beredi, degen másele tóńireginde materıal jarııalaǵan edik.