Sýpermarket pe, bazar ma? Qazaqstandaǵy saýdada kim nege mán beredi

ASTANA. KAZINFORM — Qazaqstanda saýda salasynda 1,5 mln adam jumyspen qamtylǵan, bul eldegi jumys kúshiniń 17%-yna teń. Bul týraly Qoǵamdyq saıasat ınstıtýty júrgizgen áleýmettik saýalnama nátıjesinde aıtylǵan.

Zertteýge sáıkes:

• Qalalyq turǵyndar sýpermarketter men saýda ortalyqtaryn artyq sanaıdy;
• Aýyldyq jerdegi halyq pen egde jastaǵylar bazarlar men dástúrli saýda oryndaryn jıi tańdaıdy;
• Turmystyq taýarlardyń 36,9%-y, azyq-túliktiń 33,3%-y sýpermarketterden alynady;
• Kıimniń 43,1%-y bazarlardan satyp alynady.

- Onlaın-saýdanyń úlesi artyp keledi. Kıim men turmystyq zattardy ınternetten satyp alý jastar men áıelder arasynda keń taralǵan. Elektrondyq saýda naryǵy 2022 jyldan beri 60%-ǵa ósip, 2024 jyly 3,2 trln teńgege jetti. Onyń bólshek saýdadaǵy úlesi 14,1%-dy qurady, - delingen aqparatta.

Salada áıelderdiń úlesi basym, saýda qyzmetkerleriniń úshten ekisi áıelder. Sonymen qatar, erler úlesi de 2021 jylǵy 30%-dan 2024 jyly 33%-ǵa artqan.

Kóterme saýda aınalymy sońǵy alty jylda 27 trln teńgeden 47,2 trln teńgege deıin ósip, 74,8% ósim kórsetken.

Al bólshek saýda kólemi 2019 jylǵy 11,3 trln teńgeden 2024 jyly 23,6 trln teńgege jetip, eki eseden astam artqan.

Aıta keteıik, alty aıda Qazaqstanda 54 saýda úıi paıdalanýǵa berildi.