Sýperkýbok-2022 men Qazaqstan Kýbogy -2022 Aqtaýda ótedi
Búgin sýperkýbok 17 shaǵyn aýdandaǵy «Halyq arena» sport kesheninde saǵat 16:00-de ótedi.
Al 7-10 qyrkúıek aralyǵynda el Kýbogynyń matchtary ótedi. Oǵan segiz komanda qatysady. Atap aıtqanda, «Rahmet» (Aqtóbe), «Astana» (Nur-Sultan), «Qaırat» (Almaty), «Kaspıı» (Aqtaý), «Aqtóbe» (Aqtóbe), «Atyraý» (Atyraý), «Aıat» (Rýdnyı), «Baıterek» (Oral) komandalary.
«Qazaqstan fýtzalynyń tarıhy Mańǵystaý ólkesinen bastalǵan. Sol sebepti «Sýperkýboktyń» jáne «Qazaqstan Kýbogynyń» maýsymy Aqtaýda ótedi dep bekittik. Mańǵystaýdaǵy fýtzal oıyndarynyń uıymdastyrýshylyq deńgeıi, jankúıerlik qoldaýlary barlyq Qazaqstan fýtzal oıyndaryna úlgi bolyp otyr, - dedi Qazaqstan Fýtzal Assotsıatsııasynyń prezıdenti Tóleýǵalı Taıtýleev.
Oıyndardyń ádil ótýin qamtamasyz etý, tóreshilerdiń deńgeıin kóterý maqsatynda árbir oıyn bitken soń saraptama ótkizilip, tóreshilerge reıtıng jasaqtalady. Sondaı-aq UEFA tarapynan tegin tájirıbelik saǵat ótkizýge Ispanııadan arnaıy tóreshi keledi.
«Qazaqstan Kýbogy» maýsymynda komanda quramynda 80% jergilikti oıynshylar óner kórsetedi jáne klýb dırektory Ulttyq quramanyń oqý-jattyǵý jıyndaryna «Kaspıı» klýbynan 2 oıynshy shaqyryldy», - dep atap ótti «Kaspıı» MFK dırektory Erjan Djambırov.
«Jańa maýsymnyń Aqtaýda bastalǵaly turǵanyna qýanyshtymyn. Sebebi qalanyń teńiz jaǵalaýynda ornalasýynyń ózi oıynshylarǵa keremet atmosfera syılaıdy. Ispanııa, Portýgalııa sııaqty elderde úlken matchtardy teńiz jaǵasynda ótkizýge tyrysady. Qazaqstanda da osyndaı múmkindik bar, sondyqtan maýsym boıy atmosferanyń keremet bolatynyna kúmán joq», - dedi «Qaırattyń» bas bapkeri Rıkardo Kaka.
