Sýperkompıýterdi qurý: jabdyqtardy AQSh-tan jetkizý protsesi qalaı júrip jatyr

ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi mınıstrligi sýperkompıýterge qajet jabdyqtardy jetkizý protsesine túsinik berdi.

- Mınıstrlik elde jasandy ıntellekt úshin tehnologııalyq ınfraqurylymdy qurý boıynsha tıisti jumysty atqaryp otyr. Qazaqstan Respýblıkasynyń aýmaǵynda sýperkompıýterdi ornalastyrýǵa qajetti Nvidia esepteý qýattarynyń eksporty úshin ótinim berildi, bul barlyq elder úshin qoldanylatyn standartty protsedýra. Eksporttyq lıtsenzııa alý protsesi AQSh úkimettik organdarynda belgilengen tártippen júzege asyrylady. Sýperkompıýterdi qurý jumystary eksporttyq lıtsenzııa alynǵannan keıin jáne qajetti jabdyq el aýmaǵyna jetkizilgen soń aıaqtalady. Ornatý jáne iske qosý kezeńi aıaqtalǵannan keıin, sýperkompıýter jumysqa daıyn bolady, - delingen Tsıfrlyq damý mınıstrliginiń Kazinform agenttigine bergen jaýabynda.

Sonymen qatar vedomstvo sýperkompıýterdi jalǵa berý múmkindigi bolatynyn naqtylady.

- Sýperkompıýter ınfraqurylymy Ulttyq jasandy ıntellekt platformasymen biriktirilip, memlekettik tsıfrlyq ónimderdi ázirleý jáne engizý úshin negizgi elementke aınalady. Erekshe nazar úlken tildik modeli KazLLM-dy qoldaýǵa jáne onyń negizinde JI agentterin jasaýǵa aýdarylady. Sondaı-aq, mınıstrlik esepteý qýattaryn bıznes pen ǵylymı qaýymdastyqqa jalǵa berý múmkindigin qarastyrady, - dep atalyp ótken mınıstrlik málimetinde.

Eske salsaq, Qazaqstan qýaty kúshti sýperkompıýter qurýǵa kiristi.