Sýperkompıýter qurý: Qazaqstanǵa qajet jabdyqtar jetkizildi
ASTANA. KAZINFORM – Sýperkompıýterdi qurýǵa qajet Nvidia-nyń alǵashqy chıpteri jetkizildi. Bul týraly Tsıfrlyq damý, ınnovatsııalar jáne aeroǵarysh ónerkásibi birinshi vıtse-mınıstri Qanysh Tóleýshın málim etti.
- Platformadaǵy mańyzdy baǵyttyń biri – sýperkompıýter. Biz Nvidia-nyń alǵashqy chıpterin aldyq. Olar ornatylyp, memlekettik organdarǵa taratyldy. Osy chıpterdiń negizinde memlekettik qyzmetshilerdiń jumysyna kómektesetin agentter men jasandy ıntellekke qatysty júıe ázirlenip jatyr, - dedi Q. Tóleýshın elordada Parlament Májilisi janyndaǵy Qoǵamdyq palatanyń kóshpeli otyrysynda «Jasandy ıntellekt týraly» zań jobasyn talqylaý kezinde.
Onyń aıtýynsha, shetelde de elimizdiń klasteri bar. Ol bizge kóbirek qýatty qajet etetin basqa kúrdeli modelderdi daıyndaýǵa múmkindik beredi.
- Máselen, biz sheteldegi klasterlerde osyndaı aýqymdy múmkindikterdi paıdalana otyryp, úlken modeldi ázirledik. Biz munymen toqtamaımyz. Bizde qýattyraq sýperkompıýter bolady. Osy oraıda AQSh-taǵy retteýshiden barlyq qajet ruqsattardy aldyq. Meniń oıymsha, bıyl bizde jetkilikti qýatty júıeni jasaqtaımyz, ony tek memlekettik organdarǵa ǵana emes, sonymen qatar baǵdarlama ázirleýshilerge, startaptarǵa, ǵalymdar men sarapshylarǵa taratamyz, - dedi vıtse-mınıstr.
Eske salsaq, atalǵan zań jobasy bıyl naýryz aıynda Májiliste tanystyrylǵan edi.
Zań jobasy jasandy ıntellekt tehnologııalaryn (júıelerin) paıdalanýdyń biryńǵaı quqyqtyq bazasyn belgileýge baǵyttalǵan.
Buǵan deıin Qazaqstan qýaty kúshti sýperkompıýter qurýǵa kiriskenin jazǵan edik.
Byltyr kúzde mınıstrlik sýperkompıýter úshin jabdyqqa Amerıka Qurama Shtattaryna aldyn ala tapsyrys bergenin málimdedi.
Degenmen, Qazaqstanǵa jabdyqty jetkizý merzimi AQSh úkimetiniń Qazaqstan Respýblıkasyna chıpterdi eksporttaý týraly qorytyndysyn shyǵarýyna baılanysty. Amerıkalyq tarap eksport lıtsenzııasyn alý protsesi uzaqqa sozylatynyn habarlady.
Bıyl sáýir aıynyń basynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Qazaqstanǵa qýaty kúshti sýperkompıýter qurýǵa qajet jabdyqtar taıaý arada jetkiziletinin aıtty.