Sýperkompıýter fýtboldan 2026 jylǵy Álem chempıonatynyń basty favorıtin atady

Aıta keteıik, bıylǵy álem chempıonatyna rekordtyq kórsetkish boıynsha 48 ulttyq qurama qatysady. AQSh, Kanada jáne Meksıkada ótetin týrnır aıasynda jalpy sany 104 match ótedi dep josparlanǵan.

Sarapshylardyń aıtýynsha, qatysýshylar sanynyń artýyna baılanysty bıylǵy álem chempıonatynyń nátıjesin boljaý burynǵydan da kúrdelene túsken.

Tıtýlǵa basty úmitkerler úshtigi

Yqtımaldyqtardy esepteý barysynda Opta sarapshylary quramalardyń deńgeıin, sońǵy matchtardaǵy nátıjelerin jáne ótken jyldardaǵy kórsetkishterin eskergen.

Modeldeý qorytyndysy boıynsha, Ispanııa quramasy sımýlıatsııalardyń 16,1%-ynda jeńimpaz atanyp, týrnırdiń basty favorıti retinde tanyldy. Sonymen qatar, ıspandyqtar shırek fınalǵa shyǵý múmkindigi 50%-dan asqan jalǵyz qurama boldy. Olardyń jartylaı fınalǵa ótý yqtımaldyǵy 39% dep baǵalanǵan.

Qazirgi Eýropa chempıondarynyń sapynda Lamın ıAmal, Rodrı, Pedrı jáne Nıko Ýılıams sekildi juldyzdar óner kórsetedi.

Favorıtter reıtınginde ekinshi oryn Frantsııa quramasyna buıyrdy. Onyń álem chempıony ataný múmkindigi 13% dep baǵalanyp otyr. Dıde Desham baptaıtyn komanda 2018 jáne 2022 jyldary qatarynan álem chempıonatynyń fınalyna deıin jetken. Quramanyń kóshbasshysy ári kapıtany — Kılıan Mbappe.

Al úshinshi úmitker retinde Opta Anglııa quramasyn atady. Aǵylshyndardyń chempıon ataný yqtımaldyǵy 11,2%-dy quraıdy. Tomas Týheldiń jetekshiligimen komanda irikteý kezeńindegi segiz matchtyń barlyǵynda jeńiske jetip, birde-bir gol jibergen joq. Quramda Garrı Keın, Djýd Bellıngem, Deklan Raıs jáne Býkaıo Saka syndy oıynshylar bar.

Favorıtter qataryna kimder endi

Qazirgi álem chempıony — Argentına quramasy favorıtter reıtınginde tórtinshi orynǵa jaıǵasty. Opta sarapshylary komandanyń chempıondyq ataǵyn saqtap qalý múmkindigin 10,4% dep baǵalady.

Argentına quramasynyń kapıtany Lıonel Messı úshin bul álem chempıonaty mansabyndaǵy sońǵysy bolýy múmkin. Onymen birge ulttyq qurama sapynda Laýtaro Martınes, Hýlıan Alvares jáne Enso Fernandes óner kórsetedi. Álemniń qazirgi chempıondary 1962 jylǵy Brazılııa quramasynan beri álem chempıony ataǵyn qatarynan qorǵap qalǵan alǵashqy qurama atanýǵa tyrysady.

Chempıondyqqa úmitkerler qataryna sondaı-aq Portýgalııa (7%), Brazılııa (6,6%) jáne Germanııa (5,1%) quramalary da endi.

Aıta keteıik, Portýgalııa quramasy týrnırge UEFA Ulttyq lıga jeńimpazy retinde keledi. Al Krıshtıaný Ronaldý úshin aldaǵy álem chempıonaty mansabyndaǵy altynshy álem birinshiligi bolýy múmkin. Buǵan deıin mundaı jetistikke birde-bir fýtbolshy qol jetkizgen emes.

Sondaı-aq Brazılııa quramasy jańa kezeńdi Karla Anchelottıdiń jetekshiligimen bastady.

Al Germanııa quramasy sońǵy jyldardaǵy iri týrnırlerdegi sátsizdikterden keıin álemniń úzdik komandalary qataryna qaıta oralýdy kózdep otyr.

Polymarket boljamdary ne deıdi

Uqsas nátıjelerdi iri boljam platformalarynyń biri sanalatyn Polymarket te kórsetip otyr.

Platforma derekterine sáıkes, álem chempıonatynyń basty favorıti – Frantsııa quramasy. Onyń chempıon ataný yqtımaldyǵy 17,1% dep baǵalanǵan.

Odan keıin Ispanııa (16,4%) men Anglııa (11,2%) quramalary ornalasqan.

Portýgalııanyń jeńiske jetý múmkindigi 9,6% dep baǵalansa, Argentınaǵa – 9%, Brazılııaǵa 8% yqtımaldyq berilgen.

Kelesi oryndarda Germanııa (6%), Nıderland (4%), Norvegııa (3%) jáne Belgııa (2%) quramalary tur.

Taǵy qaı quramalarǵa nazar aýdarǵan jón

Moıyndalǵan favorıtterden bólek, sarapshylar týrnırde joǵary nátıjege qol jetkizýi múmkin birneshe quramany da atap ótti.

Nıderland pen Norvegııa quramalarynyń chempıon ataný múmkindigi shamamen 3,5% dep baǵalanyp otyr. Norvegııalyqtar týrnırge jaqsy babynda kelip otyr. Komandanyń kóshbasshysy Erlıng Holand irikteý kezeńinde 16 gol soqqan.

Al Qatardaǵy álem chempıonatynyń basty sensatsııalarynyń birine aınalyp, jartylaı fınalǵa deıin jetken Marokko quramasy Afrıkadaǵy eń myqty komanda mártebesin saqtap otyr.

Sarapshylar yqtımal favorıtter qataryna 2024 jylǵy Amerıka kýbogynyń fınalyna shyqqan Kolýmbııa quramasyn da engizgen.

Eske salaıyq, buǵan deıin álem chempıonatynyń basty jańalyqtaryna aınalýy múmkin 15 jas fýtbolshy týraly habarlanǵan bolatyn.

Aıta keteıik, 2026 jylǵy fýtboldan álem chempıonaty tarıhta alǵash ret birden úsh elde – AQSh, Kanada jáne Meksıkada ótedi. Týrnır matchtary 11 maýsym men 19 shilde aralyǵynda 16 qalada uıymdastyrylady.

Sondaı-aq bul FIFA tarıhyndaǵy eń aýqymdy álem chempıonaty bolmaq. Óıtkeni alǵash ret toptyq kezeńde 48 ulttyq qurama baq synaıdy.

Materıaldyń aǵylshyn tilindegi nusqasyn osy jerden oqı alasyz.