Sýperkompıýter 10 kúnnen keıin daıyn bolady — Baǵdat Mýsın
ASTANA. KAZINFORM — «Qazaqtelekom» AQ basqarma tóraǵasy Baǵdat Mýsın áleýmettik jelide Almatyda sýperkompıýter ornatýdyń jaqyn arada bastalatynyn aıtty.
Keshe qoımaǵa bardyq. «Qazaqstannyń bolashaǵy» bolatyn temir qondyrǵynyń aman-esen kelgenine kóz jetkizip, kóńilimiz ornyna tústi. Vıdeokartalar ornynda eken, — dep jazdy Baǵdat Mýsın.
Ol Almatyda «Qazaqtelekom» derekter ortalyǵynyń alańynda montajdaý jumystary bastalatynyn aıtty.
Bizdiń NVIDIA H200 negizindegi sýperkompıýterimiz qazirdiń ózinde elde. Jaqynda Almatyda — «Qazaqtelekom» derekter ortalyǵynyń alańynda montajdaý jumystaryn bastaımyz. 10 kúnnen keıin ol daıyn bolady. Asyra silteýsiz aıtsaq, myqty zat: 6,7 mıllıon CUDA ıadro, 1600 petaflop jáne ondaǵan terabaıt GPU jady, — dedi Qazaqtelekom basshysy.
Baǵdat Mýsın munyń bári memlekettik organdar, ulttyq kompanııalar men korporatıvtik tapsyrys berýshilerge qoljetimdi bolatyny aıtty.
Tehnogendik apattar men qaýip-qater bastalmaı turyp modeldeý, qalalardaǵy trafıkti aldaǵy jyldarǵa esepteý, dárigerlerge derekterdiń úlken massıvteri negizinde tezirek dıagnoz qoıýǵa kómektesý, qazaq tilin, mádenıetin, tarıhyn jáne qazirgi kontekstin túsinetin úlken tildik modelderdi úıretýge bolady. Sheteldik serverlerge táýeldi bolmaı, ózińizdiń JI-ónimderińizdi iske qosýǵa múmkindik, — dedi Baǵdat Mýsın.
Aıta ketelik sýperkompıýterge qosymsha qýatty chıpter jetkiziletini týraly jazǵan edik.