Super Show. Creative Music Lab: tórt leıbl jańa hıt úshin baq synaıdy

ASTANA. KAZINFORM — Jibek Joly telearnasynda otandyq shoý-bızneske jańa esimder men tyń mýzykalyq týyndylar ákelýdi kózdeıtin «Super Show. Creative Music Lab» realıtı-jobasy kórermenge jol tartty. 

«Super Show. Creative Music Lab»: tórt leıbl jańa hıt úshin baq synaıdy
Foto: Vıdeodan skrın

Joba aıasynda tórt mýzykalyq leıbl ózara básekege túsip, jańa hıt jasaýǵa kúsh salady. Bul týraly WHITE leıbl komandasy búgin Jibek Joly telearnasynyń «Búgin.LIVE» baǵdarlamasynda aıtyp berdi.

Jobanyń basty ereksheligi — báseke tek oryndaýshylar arasynda emes, olardyń artyndaǵy shyǵarmashylyq komandalar arasynda da órbıdi. Prodıýserler, ánshiler, kompozıtorlar men aranjırovka mamandary birlesip jumys istep, mýzykalyq týyndynyń alǵashqy nusqasynan bastap daıyn ánge deıingi búkil úderisti kórermenge kórsetedi.

Tórt leıbldiń árqaısysyn ózindik mýzykalyq qoltańbasy qalyptasqan prodıýserler basqarady. Qatysýshylardyń qabileti, mýzykalyq talǵamy men komandalyq jumysy synalady. Joba ár jeksenbi saıyn Jibek Joly telearnasynan kórsetiledi.

Bul joly jobadaǵy WHITE leıbldi belgili mýzykant ári prodıýser Erbolat Bedelhan basqarady. Onyń komandasynda jas ánshi RIMMA, ıaǵnı Rımma Ahmetova jáne dybys rejısseri, mýzykalyq óńdeýshi Oljas Nurǵalıev bar.

Erbolat Bedelhannyń aıtýynsha, jobadaǵy básekelesterdiń deńgeıi joǵary. Komandalar arasynda mıllıondaǵan tyńdarmany bar oryndaýshylar men kásibı vokalıster de kezdesedi. Sondyqtan mýzykalyq baǵyt pen komandanyń ózara túsinistigi mańyzdy ról atqarýy múmkin.

«Super Show. Creative Music Lab»: tórt leıbl jańa hıt úshin baq synaıdy
Foto: Vıdeodan skrın

— Bizdiń qarsylastarymyz óte myqty. Olardyń arasynda daýsy keremet ánshiler, hıtmeıkerler, mıllıondaǵan aýdıtorııasy bar oryndaýshylar bar. Bular — kásibı, tyńdarman súıip tyńdaıtyn ónerpazdar. Sondyqtan bul jobada mýzykalyq janrdyń da úlken ról atqaratynyn oılaımyz. Degenmen, óz komandamyzǵa senimdimiz. Bir-birimizdi jaqsy túsinemiz, bir-birimizge baýyr basyp úlgerdik. Aramyzda keıbir máseleler bolǵanymen, olardy sátti sheshtik, — dedi prodıýser.

WHITE leıbldiń ánshisi RIMMA úshin bul joba — shyǵarmashylyq komandamen jumys isteýdiń jańa tájirıbesi. Rımma bala kezinen mýzykamen aınalysqan. Bastaýysh synypta fortepıano bóliminde oqyp, keıin vokalmen óz betinshe jumysyn jalǵastyrǵan. Ánshi Tchaikovsky atyndaǵy mýzyka mektebine de túsken.

— Ata-anam meni bala kezimnen qoldap keledi. Birinshi synyptan besinshi synypqa deıin Jubanov atyndaǵy mýzyka mektebinde fortepıano bóliminde oqydym. Keıin jalpy bilim beretin mektepke aýyssam da, vokalmen aınalysýdy toqtatqan joqpyn. Toǵyzynshy synypta bolashaq mamandyǵymdy tańdaǵanda, «vokal» dep jazdym. Sol kezde synyptastarymnyń ata-analary kúlip, ánshi bolýdy kádimgi mamandyq dep qabyldamaǵan edi. Biraq ákem meniń mýzykaǵa degen súıispenshiligimdi biletin jáne maǵan senetin. Men ata-anamnyń tolyq qoldaýymen óstim, — dedi RIMMA.

Ánshiniń aıtýynsha, ol bala kezinen Britney Spears pen Ariana Grande ánderin tyńdap ósken. Qazaq estradasynan «KeshYOU» tobynyń jáne Janar Duǵalovanyń shyǵarmashylyǵyn jaqsy kórgen.

— Maǵan shyǵarmashylyq komandamen, ózim «aǵalarym» dep ataıtyn jigittermen jumys isteý óte unaıdy. Árıne, bul — stressi kóp jumys. Biraq men odan lázzat alamyn. Erbolat aǵamen burynnan tanyspyn, onyń shyǵarmashylyǵyn jaqsy bilemin. Joba aıasynda ony sanaly túrde tańdadym, sebebi mýzykalyq stıliniń ereksheligi maǵan jaqyn, — dedi ánshi.

Jobada ánniń sahnaǵa deıingi jolyn kórsetýge dybys rejısserleri men mýzykalyq óńdeýshilerdiń qatysýy da múmkindik beredi. Oljas Nurǵalıevtiń mindeti — ánniń dybystyq qurylymyn qalyptastyrý, aranjırovka jasaý jáne shyǵarmashylyq sheshimderdi júzege asyrý.

Osylaısha, «Super Show. Creative Music Lab» daıyn ándi tyńdatýmen shektelmeı, onyń qalaı dúnıege keletinin de kórsetedi. Tórt leıbldiń shyǵarmashylyq básekesi nátıjesinde qandaı týyndylar tyńdarman júregine jol tabatyny jobanyń aldaǵy shyǵarylymdarynda belgili bolady.

Buǵan deıin Dımashtyń «AQERKE» áni halyqaralyq jazǵy hıt-paradtyń úzdik úshtigine engenin jazdyq.