«Sýper Lotodan» 69 410 662 teńge utysqa ıe bolǵan eki jeńimpaz marapattaldy
; ALMATY. Qańtardyń 15-i. QazAqparat / Ádilet Musahaev / - Búgin Almatyda «Kazakhstan Lottery Service» JShS-i jáne «Samsung SDS» ókilderi «Sýper Loto» lotereıasynyń Astana men Shymkent qalasynda sýpersyılyǵyna ıe bolǵan eki jeńimpazdyń árqaısysyna 34 705 331 teńge somasyndaǵy chekti tapsyrdy,
dep habarlaıdy QazAqparat.
1-shi sanattaǵy jeńimpazdar 9 qańtarda «Sýper Lotonyń» tarıhynda birinshi ret ótken №6 tırajdyń nátıjesi boıynsha anyqtalǵan. Jeńimpazdar 38 sannyń ishinen 6 sandyq (1, 5, 8, 10, 19, 29) kombınatsııany dál tapqan.
Jeńimpazdyń bireýi - temirjol salasynda jumys isteıtin 51 jastaǵy ınjener E. myrza Almaty turǵyny. Oǵan elimizdiń astanasynda turatyn qaryndasy 2 bılet syılaǵan kórinedi, onyń bireýi sátti bılet bolyp shyqqan. «Men Keńes ókimeti tusynan osyndaı oıyndardy oınap kelem, osy joly juldyzym janyp jeńimpaz atanyp otyrmyn. Bul taýdaı talabyma Allanyń bergen syıy dep sanaımyn», deıdi ınjener. Ekinshi sýpersyılyq ıegeri 56 jastaǵy shymkenttik A. hanym úıiniń mańyndaǵy dúkennen eki lotereıa bıletin satyp alypty. Sonyń biri oǵan jeńis ákelgen. «Men ekinshi ret oınaý arqyly osyndaı júldege qol jetkizdim, eger sáttilikke sene alatyn bolsa, kez-kelgen adam «Sýper Lotoda» uta alady», deıdi ol.
2009 jyldyń 19 jeltoqsanynda ótkizilgen úshinshi tırajda Astana, Almaty, Taraz jáne Shymkent qalalarynan 4 adam ekinshi sanat boıynsha 5 sandy dál taýyp jáne qosymsha jeńildikke berilgen san men 10 405 733 teńge utyp alǵan.
«Sýper Loto» lotereıasynyń jańa bıletteri 2009 jyldyń 30 qarashasynda Qazaqstannyń 7 qalasy: Almaty, Astana, Qaraǵandy, Semeı, Taraz, Óskemen jáne Shymkentte satyldy. 1-den 10-shy tırajǵa deıin sýpersyılyq eń az degende 50 mıllıon teńge kóleminde bolýyna kepildik berildi. Bıletterdi bazarlarda, saýda ortalyqtarynda, avtobýs aıaldamalarynda ornalasqan onlaın-termınaldar arqyly satyp alýǵa bolady. Múmkindik retinde beriletin 38 sannyń ishinen oıynshy kez-kelgen 6-yn tańdap, túbirtekti toltyrady da ony onlaında tirkeıdi. Barynsha ashyq, jarııa túrde júrgiziletin bul jańa loto júıesi osyndaı júıelerdi jasaýdyń álemdegi úzdikteriniń biri «Samsung SDS» kompanııasynyń qatysýymen qurylǵan. Utys ár senbi saıyn KTK telearnasynda saǵat 20:20-da tikeleı efırde júrgiziledi. Júldeli oryndar tańdap alǵan sandardyń utysty nómirlermen sáıkes kelýiniń sanyna baılanysty alty sanat boıynsha anyqtalady. Bir oıynnyń quny - 100 teńge. Qazirgi ýaqytta sýpersyılyq 50 mıllıon teńgeni quraıdy. Eger ony utyp almasa, ol kelesi tırajǵa ótedi», deıdi «Kazakhstan Lottery Service» JShS Tóraǵasynyń orynbasary Esengeldi Medeýov.
