Super bol jobasy ÝEFA-da tanystyryldy
Búgin Davıd Lorııa álemdegi eń tanymal zaldardyń birinde ÝEFA aýdıtorııasyna Super bol jobasynyń qorytyndysyn usyndy. Bul týraly Kazinform jobanyń baspasóz qyzmetine silteme jasap habarlaıdy.
«ÝEFA-nyń bul zaly fýtbolmen ómir súredi jáne tynystaıdy: jyl saıyn bári Chempıondar lıgasynyń jerebe tartý rásimin baqylaıdy, keshe ol jerde EÝRO-2028 dodasyn fýtbol otanynda ótkizý týraly mańyzdy sheshim qabyldandy. Al búgin dál sol zalda qazaqstandyq ónim tanystyryldy. Prezentatsııadan bólek Qazaqstan fýtboly úshin mańyzdy oqıǵa boldy – Super bol men UEFA MIP Alumni Association (ÝEFA-nyń Qurama oıynshylaryna menedjementti úıretý baǵdarlamasy túlekteriniń qaýymdastyǵy) arasynda seriktestik týraly memorandýmǵa qol qoıyldy. UEFA MIP Alumni Association tarapynan mańyzdy qujatqa Garret Farrellı qol qoıdy, – delingen aqparatta.
Atalǵan qaýymdastyqqa kimder kiredi? Baǵdarlama túlekteriniń qatarynda – Rıkardo Kaka, Jýlıo Sezar, Floran Malýda, Klemens Frıtts, Kolo Týre bar.
Jańa seriktestik Super bol jobasyn halyqaralyq deńgeıge shyǵaryp, damýǵa jol ashady.
Super bol jobasyn tanystyrýǵa Davıd Lorııamen birge BUU janyndaǵy Qazaqstannyń turaqty ókili Erlan Álimbaev pen Qazaqstan fýtbol federatsııasy atqarý komıtetiniń múshesi Asqar Uranhaev ta qatysty.
