Super Bol oıynshylary Premer-Lıga komandalaryna shaqyrtý aldy
9 shilde kúni Qazsport telearnasynda Aqparat jáne qoǵamdyq damý mınıstrliginiń qoldaýymen Super Bol atty realıtı-shoý formatyndaǵy eń aýqymdy joba bastaldy, dep habarlaıdy QazAqparat.
Jobanyń hedlaınerleri ardager fýtbolshylar Davıd Lorııa jáne Samat Smakov boldy. Kastıngterge barlyǵy 6000-nan astam qatysýshy ótinim berdi, olardyń tek 132-si ǵana Almatydaǵy fınaldyq synaqqa irikteldi.
Joba hedlaınerleriniń aıtýynsha, Super bol toǵystyrǵan 25 fınalıstiń túrli taǵdyry bar. Árqaısysy da sharbolattaı shynyǵyp, shıyrshyq atyp turǵan shyn myqtylar.
Jobanyń fınaldyq matchy 20 tamyzda Nur-Sultandaǵy «Astana Arena» stadıonynda ótti. Oǵan eýropalyq, azııalyq jáne qazaqstandyq klýbtardyń skaýttary keldi.
«Bul jobadan belsendilerdiń, bıznestiń áleýmettik jaýapkershiligi men memlekettik qoldaýyn kórýge bolady. Bul - jastaǵa arnalǵan áleýmettik lıft. Super bol urany - «Jańa Qazaqstan». Bul - jańarý, jańa múmkindikter men ádilettilik kezeńi. Bizdiń Prezıdent jastar memleketimizdiń basty qundylyǵy ekenin árdaıym atap ótedi», - dedi mınıstr Asqar Omarov.
Super bol Qazaqstan Birinshi lıgasynyń kásibı klýby FC Jenispen oınady. Match 2:2 esebimen aıaqtaldy. Matchtan keıingi penaltı serııasynda SuperBol surmergenderi múlt ketpeı, jeńiske jetti.
Upaıy joǵary ulandardy taǵy bir jaǵymdy jańalyq kútip tur, jas fýtbolshylar kásibı klýbtarmen kelisimshartqa qol qoıdy.
Máselen shabýylshy Dýnaıbek Aıanhan «Maqtaaraldan» shaqyrtý aldy, Álibek Jardemovtyń qolynda týǵan ólkesi «Aqtóbeden» usynys bar, al jobanyń eń jas qatysýshysy 25 jastaǵy qorǵaýshy Jaqsylyq Kenjebaevty Pavlodar oblysyndaǵy «Aqsý» klýby shaqyryp otyr. Bul tizim tolyǵatyn sekildi, sebebi ulandardy basqa da skaýttar qarap, baqylap otyr.
Esterińizge sala keteıik, joba «Dara» qory, Freedom Broker ınvestıtsııalyq kompanııasy jáne Qazaqstan fýtbol federatsııasynyń qoldaýymen júzege asyryldy.
