SUP bord tepken — Kaspııde tolqyn alyp ketken eki er adam qutqaryldy

ASTANA. KAZINFORM - Kaspıı teńizinde SUP bord tepken eki er adamdy tolqyn jaǵadan 8 km qashyqtyqqa  alyp ketken. Kýágerler olarǵa kómek kerek ekenin túsinip, qutqarýshylardy shaqyrtqan. 

"Mańǵystaý oblysynda qarańǵy kezde jigitter jergilikti tolqyndardy baǵyndyrýǵa attanǵan, biraq qatty jeldiń saldarynan óz betinshe jaǵaǵa shyǵa almaı qalǵan. Kýágerler olardyń kómekke muqtaj ekenin kórip, qutqarýshylardy shaqyrdy. TJM jedel-qutqarý jasaǵynyń qutqarýshylary kómekke asyqty. Olar jastardy taýyp, jaǵalaýǵa jetkizdi. Er adamdardyń jaǵdaıy turaqty. Olar medıtsınalyq kómekke muqtaj bolǵan joq" delingen habarlamada.

Aıta keteıik, buǵan deıin Mańǵystaý oblysynyń turǵyndary Kaspıı teńiziniń jaǵalaýyndaǵy eń ádemi jerlerdiń biri – «Kók shyǵanaq» jaǵajaıy qoqysqa tolyp ketkenin aıtyp, shaǵymdanǵany týraly jazǵan edik.