Sý obektilerin halyqty aýyzsýmen qamtamasyz etý kózderine jatqyzý qaǵıdalary bekitildi
ASTANA. KAZINFORM — Densaýlyq saqtaý mınıstri mindetin atqarýshynyń buıryǵymen sý obektilerin halyqty aýyzsýmen qamtamasyz etý kózderine jatqyzý qaǵıdalary bekitildi.
Qujatqa sáıkes, sý obektilerin halyqty aýyzsýmen qamtamasyz etý kózderine jatqyzý jáne halyqtyń sanıtarııalyq-epıdemıologııalyq salamattylyǵyn qamtamasyz etý sanıtarııalyq qaǵıdalarǵa jáne gıgıenalyq normatıvke sáıkes sharýashylyq-aýyzsýmen jabdyqtaý kózderi retinde paıdalanylýy múmkin sý obektilerin sáıkestendirý jáne jikteý jolymen júzege asyrylady.
Sý obektilerin halyqty aýyzsýmen qamtamasyz etý kózderine jatqyzý úshin mynalar:
1) sanıtarııalyq qaǵıdalarǵa sáıkes ázirlengen SQA jobasy;
2) «Halyqtyń sanıtarııalyq-epıdemıologııalyq salamattylyǵy salasyndaǵy memlekettik qyzmetterdi kórsetýdiń keıbir máseleleri týraly» Qazaqstan Respýblıkasy Densaýlyq saqtaý mınıstriniń 2020 jylǵy 30 jeltoqsandaǵy № QR DSM-336/2020 buıryǵyna (Normatıvtik quqyqtyq aktilerdi memlekettik tirkeý tiziliminde № 22004 bolyp tirkelgen) sáıkes sýmen jabdyqtaý kózine epıdemıologııalyq máni joǵary obektiniń sanıtarııalyq-epıdemıologııalyq qorytyndysy negizdeme sanalady.
Sý obektileri halyqtyń aýyzsýmen jáne sharýashylyq-turmystyq sýmen jabdyqtaý maqsatynda sý aıdyndarynyń akvatorııa ýchaskelerin (sý qoımalary, ózender, kólder, teńizder), jaǵalaýdaǵy qurlyq jolaǵyn, sondaı-aq sanıtarııalyq qorǵaý aımaqtaryn (sý aıdyndary aýyzsý jáne sharýashylyq-turmystyq sýmen jabdyqtaý kózderi retinde paıdalanylǵan jaǵdaıda) paıdalanýy úshin aýyzsýmen qamtamasyz etý kózderine jatqyzylǵan kezde mynalar:
1) daýyl, sý aıdynyna quıatyn ózenderdiń tasýy (jaıylýy) kezindegi sý aıdynynyń gıdrologııalyq jáne gıdrohımııalyq derekteri;
2) halyqty sýmen jabdyqtaý úshin sýdy neǵurlym kóp jınaý kezindegi sýdyń quramy men qasıetteriniń kórsetkishteri;
3) daýyl, sý aıdynyna quıatyn ózenderdiń tasýy (jaıylýy) kezinde normalanatyn zattar shoǵyrlanýynyń ortasha arıfmetıkalyq máni;
4) basym jaǵalaý aǵystary;
5) aıdaý-qýma jelder eskeriledi.
Osyǵan deıin habarlanǵandaı, Qyzylorda oblysynda sý resýrstaryn basqarý sharalary kúsheıtildi.