«Suńqar» arnaıy jasaǵynyń zeınetkerleri páterlerinen qýylmaıdy - sot sheshimi

ASTANA.  2 tamyz. QazAqparat -  Іshki ister mınıstrligi «Suńqar» arnaıy jasaǵy zeınetkerleriniń atalmysh memlekettik mekeme basshylyǵynyń zańǵa qaıshy is-áreketine jáne mekeme basshylyǵynyń burynǵy qyzmetkerlerdiń qyzmettik páterlerdi bosatý jónindegi talap aryzyna baılanysty azamattyq is boıynsha sot sheshimi shyqty.

Bul týraly búgin QR Joǵarǵy Sotynyń  aǵymdaǵy jyldyń 1-i jartyjyldyǵyn qorytyndylaýǵa arnalǵan brıfıng barysynda resmı ókil Oksana Peters málim etti.

Resmı ókildiń aıtýynsha, ótken jyldyń tamyz aıynda jasalǵan eskertýge sáıkes, zeınetker-ofıtserler qyzmettik páterlerin bosatýǵa tıisti bolatyn. Páter ıeleriniń baspanalaryn erikti túrde bosatýǵa qarsylyq bildirýine oraı «Suńqar» arnaıy jasaǵy memlekettik mekemesi turǵyn úıdi jaldaý jónindegi kelisimsharttyń kúshin joıý jáne olardy páterden shyǵarý jóninde sotqa shaǵymdanǵan.

«Іsti qaraý barysynda belgili bolǵanyndaı, ІІM «Suńqar» arnaıy jasaǵy memlekettik mekemesi men osy jasaqtyń 12 zeınetkeri arasynda mekemeniń turǵyn úı qory esebinen qyzmettik páterdi paıdalanýǵa berý jóninde kelisimshart jasalǵan. Ofıtserlerdiń zeınetkerlikke shyǵýyna baılanysty olarǵa páterdi bosatý týraly eskertý de jasalǵan. Mekeme basshylyǵy ózderiniń bul áreketin eńbek ótiliniń aıaqtalǵanymen túsindiripti. Alaıda, sot arnaıy jasaq basshylyǵynyń talabyn negizsiz dep tapty. Óıtkeni, burynǵy qyzmetkerler zeınetkerlikke shyǵýǵa baılanysty jumystan bosap otyr. Al zańǵa sáıkes, quqyq qorǵaý organdary qyzmetkerleri men ardagerleri basqa baspanamen qamtamasyz etilmeı turyp, qyzmettik úıden bosatylmaýy tıis», - deıdi O. Peters.

Osyǵan baılanysty, Almaty qalasy Áýezov aýdandyq sotymen «Suńqar» arnaıy jasaǵy memlekettik mekemesiniń 12 zeınetkerine qatysty talap aryzy ózgerissiz qaldyrylyp, bunymen apellıatsııalyq saty da kelisken.