Suńǵylaǵa da, surqııaǵa da syr aldyrmastan taǵyn tapsyrdy - Bekbolat Tileýhan Nazarbaevtyń málimdemesi týraly
Bekbolat Tileýhan bul kúnniń bolary anyq ekenin, alaıda, mundaı jedeldikti kútpegenin aıtty.
«Jaryq kúndegi naızaǵaıdaı tosyn jaıt. Qulaǵyma senbedim. Ras eken. Qulazyp qaldym. Ózi aıtpaqshy, ómir zańy! Zý etip kóz aldymnan shırek ǵasyrdan astam ýaqyttyń tizbegi óte shyqty. Qazaqtyń qatarǵa qosylyp, baıraq kótergen baqytty shaǵy. Qandasyn qarashańyraqqa qaıtarǵan, Astanasyn anyqtap, shekarasyn shegendep, aýzy aqqa tıgen baqytty shaǵy! Tórtkúl dúnıeniń tórt buryshyna barsa da, «Men qazaqpyn» degen sózdi qaımyqpaı, qomsynbaı aıtatyn dárejege jetken baqytty shaǵy! Jaýyn kúıindirip, dosyn súıindirgen munaradaı munartqan shaǵy!», - dep jazdy B. Tileýhan Feısbýk paraqshasynda.
Sol munarany qolymen qalaǵan qalaýly jan qarasha halqyna ókilettigin ótkizetinin aıtty.
«Otyz jyl el basqarǵanda, qandaı qadam jasaryn jatqa da, jaqynǵa da boljatpaǵan sarabdal qalpynan tanbaı sóıledi. Suńǵylaǵa da, surqııaǵa da syr aldyrmastan taǵyn tapsyrdy. Tarıh-shaldyń ózi tań qalǵandaı.
Úırene júrip úıretken, úırete júrip úırengen, albyrtty aýyzdyqtap, salǵyrtty qamshylap, aqsaqaldyń aqylyna, jastyń jalynyna, eldiń sabyryna súıene júrip, qazaǵyn shyńǵa bastaǵan beıbit te berekeli otyz jyl otyz kúndeı bolmaı óte shyǵypty», - dedi ol.
Depýtat Nursultan Nazarbaevty aqyly men qadiri asqan asyl tulǵaǵa teńedi.
«At tóbelindeı óz eli túgili, alpaýyt ózge eldiń kósemderi keńesine júginip, ara aǵaıyndyqqa salsa, aqylynyń asqandyǵy da! Jurty qımasa, qadiriniń asqandyǵy da! Alashtyń alǵysy aıryqsha ózińe, asyl tulǵa Nur-aǵam!», - dedi Bekbolat Tileýhan.