Súńgýir mamandyǵy eptilikti qajet etedi – qyzylordalyq maman
Qyzmet barysy qaýip pen qaterge toly qutqarýshy-súńgýir mamandyǵy eptilikti, qaısarlyqty, tabandylyqty qajet etedi. Sondyqtan kez kelgen adam qutqarýshy bola almaıdy. Bul jumystyń qanshalyqty aýyr ekenin ańǵartsa kerek. Kazinform sýǵa batqan turǵyndardy izdep-tabýda jankeshti eńbek etip júrgen, talaı márte azamattardy ajal aýzynan arashalaǵan súńgýir Rolan Ábdiqalyqovpen tildesti.
– 10 jyldan astam ýaqyttan beri Qyzylorda oblysy TJD Jedel qutqarý jasaǵy RMM súńgýirlik qutqarý bóliminiń basshysy qyzmetin atqaryp kelesiz. Tótenshe jaǵdaılar salasynda júrgenińizge 14 jylǵa jýyqtapty. Tájirıbeli maman retinde aıtyńyzshy, adamdar arasynda sýǵa ketý oqıǵasy elimizde nelikten jıi tirkeledi?
– Ár adamnyń ómiri – óz qolynda. «Saqtansań, saqtarmyn!» demekshi, birinshi kezekte saqtanyp júrýimiz kerek. Degenmen qaýipsizdik sharalaryna kóńil bermeı, keı tusta oqys jaǵdaılarǵa urynyp qalatynymyz jasyryn emes.
Bizde sýǵa túsýge bolmaıtyn jerlerge shomylatyndar kóp. Biz osyǵan baılanysty turǵyndar arasynda jıi úgit-nasıhat jumystaryn júrgizemiz. Qaýipsizdik sharalaryna baılanysty keńes berip, eskertý jasaımyz. Alaıda, áli de kópshilik arasynda buǵan nemquraıdy qaraıtyndar azaımaı tur. Sondyqtan keıingi kezde tilsiz jaýdyń qurbanyna aınalýshylar sany artty.
– Cýǵa túsýge baılanysty turǵyndarǵa qandaı qaýipsizdik erejelerine basa nazar aýdarǵan jón? Osyǵan qysqasha toqtalyp ótińizshi.
– Sýǵa shomylǵan jaqsy. Biraq qarapaıym erejelerdi de saqtaǵan abzal. Ol úshin shomylatyn arnaıy oryndy durys tańdaı bilgen durys. Sýǵa túsýge bolmaıtyn belgiden aspaǵan jón. Keıde turǵyndar tyıym salynǵan jerlerge shomylady. Ata-analar balalaryn sýǵa shomylý kezinde qaraýsyz qaldyrmaýy kerek. Іshimdik ishken jaǵdaıda sýǵa túsýge bolmaıdy. Ár adam osyndaı qarapaıym erejelerdi eskerse, qaýiptiń beti de seıiler edi.
– Jedel-qutqarý jasaǵynyń mamandaryna qoıylar talap qandaı?
– Jedel-qutqarý jasaǵynyń mamandary árqashan oqıǵa ornyna jyldam jetip, tótenshe jaǵdaıdyń aldyn alýǵa tyrysýy kerek. Bul – qutqarýshylardyń basty mindeti. Olardyń árqaısysy óz isin jaqsy biletin mamanǵa aınalýy tıis. Óıtkeni qutqarýshylardyń tájirıbeli bolǵany, jedel qımyldaǵany, tez sheshim qabyldaı bilgeni óte mańyzdy. Basty talap – osy. Sondyqtan biz mamandardyń sheberligin shyńdaýǵa únemi nazar aýdaryp otyramyz.
– Súńgýir mamandyǵyn tańdaǵan jastarǵa qandaı keńes berer edińiz?
– Qaı mamandyq túri de asqan jaýapkershilikti qajet etedi. Solardyń arasynan qutqarýshy mamandyǵyn erekshelep aıtýǵa bolady. Biz súńgýir, órt sóndirýshi bolsaq ta, tótenshe jaǵdaı salasynda ámbebap túrde qyzmet etemiz.
Árbir tótenshe jaǵdaı – biz úshin úlken synaq. Onda daıyndyq, jaýapkershilik, sheberlik tarazyǵa tartylady. Ár sáttiń baǵasy bar. Qysqa ýaqyttyń ishinde tez sheshim qabyldaýǵa mindetti ekeniń esińnen shyqpaıdy. Keıbir ýaqytta adam ómirin saqtap qalý úshin táýekelge bel býýǵa týra keledi. Syn saǵatta durys sheshim qabyldaı bilgen jón. Súńgýir mamandyǵy erekshe eptilikti qajet etedi. Bul salaǵa qyzyǵatyn jastar osyny eskergenderi abzal.
Men árbir áriptesimmen birlese jumys isteýge kóńil bólemin. Qyzmetimdi atqarý barysynda talaı márte azamattardy qutqaryp, olardyń alǵysyna bólene bildik. Biz úshin ol – úlken mártebe. Mereıimizdi ósiredi. Halyqtyń alǵysyn alǵannan asqan marapat joq.
Ár tótenshe jaǵdaı barysynda biz tııanaqty jumys isteýge tyrysamyz. Olaı etpeseń bolmaıdy. Qolyńda adam taǵdyry turǵanyn umytpaý lázim.
– Keıde ózennen balyq aýlaý barysynda qıyn jaǵdaıǵa tap bolatyn turǵyndar kezdesedi. Ol jóninde ne aıtar edińiz?
– Iá, kúz nemese qyz mezgilinde balyqshylardyń qaıyqpen kól ortasynda qalyp qoıý jaǵdaıy, kólikpen muz ústinde júrý saldarynan sýǵa batý oqıǵasy tirkeledi. Máselen, keıbir eldimeken turǵyndary baratyn jerine tóte jolmen barǵysy keledi. Alaıda sol ýaqytta ózen ústindegi muzdyń qalyńdyǵy juqa bolyp shyǵady. Juqa muz aýyr salmaqtaǵy kólikti kótere almaýy yqtımal. Mundaı jaǵdaıda tótenshe oqıǵa týyndap jatady.
Qyzylorda oblysy elimizdegi jyly aımaqtar qataryna jatady. Qys mezgiliniń ózinde sý aıdyndarynda muzdyń qalyńdyǵy juqa bolady. Sondyqtan turǵyndardan suraıtynymyz, baratyn jerge qaýipsiz jolmen jetýge nazar aýdarsańyzdar eken.
– Áńgimeńizge raqmet.
