Súndet Baıǵojın týǵan jerinde tuńǵysh kontsertin ótkizdi
QOSTANAI. QazAqparat - Qazaqstandaǵy tanymal opera ánshisi Súndet Baıǵojın Qostanaıdaǵy birinshi án keshin ótkizdi, dep habarlaıdy QazAqparat tilshisi.
Oblystyq fılarmonııaǵa jıylǵan kisi qarasy kóp boldy. Kesh ıesi aldymen Abaıdyń «Kózimniń qarasy» ánin oryndady. Jerlesteriniń ystyq yqylasy «Surshaqyz», «Aqqýraı» sııaqty halyq ánderinen soń da baıqaldy.
Kontserttik baǵdarlamada Qazaqstannyń mádenıet qaıratkerleri Bıbigúl Tólegenova, Nurjamal Úsenbaeva, Tólegen Muhamedjanovtar beınequttyqtaýlaryn joldady.
«Súndet - bizdiń maqtanyshymyz. Onyń Rım sahnasyn baǵyndyratynyna senimim mol. Jas kezinen ónerge degen qulshynysynyń arqasynda talaı jetistikterge jetti. Súndettikindeı daýys ekiniń birinde joq», - dep aǵynan jaryldy Nurjamal Úsenbaeva.
Munan soń ataqty Avgýstın Laranyń «Granada», Valenteniń «Passione», Petr Býlahovtyń «Troıkasy» shyrqaldy. Sondaı-aq, qostanaılyqtardy óz ónerlerimen qýantý úshin «Astana Opera» teatrynyń bir top ártisteri keldi. Atap aıtsaq, Súndet Baıǵojın Aızada Qapanovamen birge «Sevılıa shashtarazy» operasyndaǵy Fıgaro men Rozınany, Maıra Beıneshpen «Marjan izdeýshi» operasyndaǵy Nadır men Zýrgıdi oryndady.
«Týǵan jerdegi tuńǵysh kontserttik kesh jaqsy ótti dep oılaımyn. Meni qoldaýǵa kelgen barsha áriptesterime, tyńdarmandaryma alǵys bildiremin. Rım sahnasyn baǵyndyrýym úshin sizderdiń senimderińiz asa qajet», - dep bólisti opera ánshisi.
Eske salaıyq, Súndet Baıǵojın keshe tilshilermen kezdesý barysynda Italııaǵa attanar aldynda, jerlesteriniń batasyn alyp ketýge kelgenin aıtqan edi.
