Súndet Baıǵojın Samarqandtaǵy mýzyka festıvalinde óner kórsetti
TAShKENT. QazAqparat - Samarqandta «Shark taronaları» (Shyǵys áýenderi) on birinshi halyqaralyq etnografııalyq mýzyka festıvali bastaldy, dep habarlaıdy «QazAqparat» HAA menshikti tilshisi.
Festıvaldiń saltanatty bólimin Ózbekstan prezıdenti Shavkat Mırzıeev ashty. «Álemde qarýly qaqtyǵystar men teketirester órship turǵan qazirgi kúrdeli kezeńde mýzykalyq ónerge basa nazar aýdarylyp, onyń róli kúsheıtilýde. Ol eshqandaı aýdarmashysyz túrli ult, til jáne din ókilderin biriktirip, mıllıondaǵan adamdardyń dostastyǵyn, yntymaqtastyǵyn jáne tatýlyǵyn odan ári nyǵaıtýda. Osy turǵyda atalmysh mýzykalyq festıval úlken mańyzǵa ıe, sebebi ol osyndaı aıtýly jyly - qurylǵanyna 20 jyl tolǵan kezde ótkizilip otyr», - dep atap ótti Sh. Mırzıeev.
Bıyl mýzykalyq merekege 58 elden 241 qatysýshy keldi. Qazaqstandyq taraptan festıvalde «Astana Opera» teatrynyń solısi Súndet Baıǵojın Eskendir Hasanǵalıevtiń «Saǵyndym seni» ánin oryndap, óner kórsetti.
Budan bólek, Samarqandta mereke aıasynda ulttyq kıimder, aspaptar, sondaı-aq jergilikti qolónershiler buıymdarynyń kórmeleri uıymdastyryldy. 
