Súndet Baıǵojın ıtalııalyq tyńdarmannyń qoshemetine bólendi
NUR-SULTAN. QazAqparat - Italııada óner kórsetken «Astana Opera» teatrynyń jetekshi solısi, Qazaqstannyń eńbek sińirgen qaıratkeri Súndet Baıǵojın tyńdarmannyń ystyq yqylasyna bólendi, dep habarlaıdy QazAqparat.
Teatrdyń baspasóz qyzmetinen málim etkendeı, 15, 18 jáne 20 maýsym kúnderi tanymal qazaqstandyq barıton genýıalyq Karlo Felıche teatrynyń sahnasynda Dj.Pýchchınıdiń «Madam Batterflıaı» operasynda Sharples partııasyn usyndy.
«Operanyń otany oıdaǵydaı qabyldady dep senimmen aıta alamyn. Alǵash ret dál osy sahnada ıtalııalyqtar aldynda «Astana Opera» teatrynyń trýppasymen birge qazaq tilindegi «Abaı» ulttyq operasymen óner kórsetken edim. Shyǵarmashylyq kópirimiz jyldan-jylǵa nyǵaıyp keledi. Jalpy, qoıylymnyń sátti shyǵýy ujymdyq jumysqa baılanysty. Tynbaı eńbektendik, nátıjesinde - ıtalııalyq tyńdarmannyń sheksiz iltıpaty men qoshemeti. Qoıylymǵa álemniń ár túkpirinen shaqyrylǵan áriptesterimmen birge jumys jasaǵanyma zor qýanyshtymyn», - dedi Súndet Baıǵojın.
Genýıa qalasynyń turǵyndaryna usynylǵan «Madam Batterflıaı» spektakliniń rejısserlik nusqasy, dekoratsııalary men kostıýmderi elordalyq «Astana Opera» teatrynan Italııaǵa jetkizildi. Qoıýshy rejısser - Lorentso Amato. Kórkemdik bezendirilýin jasaǵan - zamanymyzdyń kórnekti teatr sýretshisi Etsıo Frıdjerıo men kostıýmder boıynsha sýretshi - «Oskar» syılyǵynyń laýreaty Franka Skýarchapıno. Karlo Felıche teatrynyń orkestri men hory maestro Djýzeppe Akýavıvanyń jetekshiligimen óner kórsetti.
«Astana Opera» sahnasynda osy qoıylymda óner kórsetken bolatynmyn. Degenmen, ár spektaklden keıin óz beıneńe tyń reńkter ústep, keıipkerdiń minez-qulqynyń jańa qyrlaryn ashýǵa tyrysasyń. Italııada kóp rejısserlik ózgerister engizildi. Bir aı boıy túrli elden kelgen oryndaýshylarmen daıyndaldyq. Sheteldik áriptesterimmen tez til tabysyp kettim, bir-birimizdi birden túsindik. Qarqyndy daıyndyq jumystarynan keıin rejısserdiń túpki oıyn jetkize bildik. Biraq qaı teatrda óner kórsetsem de, «Astana Opera» teatrymnyń ómirimde alar orny erekshe», - dep atap ótti jetekshi solıst.
Osy kúnderi Chıo-Chıo-san partııasynda Marııa Tereza Leva sahna tórine shyqty, Sýzýkı - Karlotta Vıchı, Pınkerton - Ragaa Eldın, Goro - Alessandro Fantonı, Bonza aǵa - Djon Pol Hakl.
Eske salar bolsaq, ótken jyly qarasha aıynda Genýıanyń basty operalyq sahnasynda Súndet Baıǵojın A.Jubanov pen L.Hamıdıdiń «Abaı» operalyq jaýharynyń ıtalııalyq premerasynda basty Abaı partııasyn qazaq tilinde oryndaǵan. Spektakl «Rýhanı jańǵyrý» baǵdarlamasy aıasynda QR Mádenıet jáne sport mınıstrliginiń qoldaýymen ótken «Astana Opera» teatrynyń eýropalyq týrnesiniń bir bóligi boldy.
Budan bólek, vokalıstiń qyzmettik tiziminde Verona qalasyndaǵy Fılarmonıko teatrynda Dj.Pýchchınıdiń «Bogema» operasyndaǵy Marsel jáne Dj.Rossınıdiń «Sevıldik shashtaraz» operasyndaǵy Fıgaro syndy basty partııalarda tamasha óner kórsetýleri bar.
Súndet Baıǵojın - kóptegen bedeldi halyqaralyq baıqaýlardyń laýreaty, sonyń ishinde B.A.Tólegenova atyndaǵy vokalıster baıqaýynyń Bas júlde ıegeri, Italııada ótken Toti dal Monte (Trevızo q.) jáne Arena di Verona operalyq ánshiler qory baıqaýlarynyń jeńimpazy bolǵanyn atap ótken jón. Jetekshi solıst Nıý-Iorktegi Karnegı-holl (AQSh), Berlın fılarmonııasy (Germanııa), Parıjdegi Elıseı alańy teatry (Frantsııa), Venadaǵy Kontserthaýs (Avstrııa) sııaqty álemniń ataqty sahnalarynda, sondaı-aq Japonııa, Ońtústik Koreıa, Túrkııa, Iordanııa, Túrikmenstan, Reseı, Belarýs jáne t.b. elderdiń sahnalarynda tabysty óner kórsetken. Onyń repertýaryna qazaq jáne sheteldik klassıkanyń operalyq týyndylaryndaǵy basty partııalar enedi: Bekejan («Qyz Jibek», E.Brýsılovskıı), Eskamılo («Karmen», J.Bıze), Jorj Jermon («Travıata», Dj.Verdı), Lesko («Manon Lesko», Dj.Pýchchını), Malatesta («Don Paskýale», G.Donıtsettı), Onegın («Evgenıı Onegın», P.Chaıkovskıı), Aleko («Aleko», S.Rahmanınov) jáne taǵy basqa.
