Súndet Baıǵojın «Bolshaıa opera» jobasynyń fınalyna ótpeı qaldy
ASTANA. QazAqparat - Qazaqstandyq barıton Súndet Baıǵojın «Bolshaıa opera» telejobasynan shyǵyp qaldy. On birinshi baǵdarlamanyń qorytyndysy boıynsha, oryndaýshy fınalısterdiń úshtigine enbeı qaldy, dep habarlaıdy QazAqparat tilshisi.
Jobanyń fınaldy shyǵarylymynda qatysýshylar eki nómirden oryndady. Djoakkıno Rossını, Djýzeppe Verdı, Gıýstav Sharpante, Jorj Bıze operalarynyń arııalary, Isaak Dýnaevskıı, Serafım Týlıkov, Alekseı Machavarıanı, Alekseı Komıtastyń ánderi shyrqaldy.
«Bolshaıa opera» fınalısterin «Gelıkon-opera» Máskeý mýzykalyq teatrynyń rejısseri jáne kórkemdik jetekshisi Dmıtrıı Bertman, rýmynııalyq opera ánshisi koloratýrlyq soprano ıesi Nellı Mırıchoıý, belgııalyq opera ánshisi, tenor Aksel Eıverart, Reseıdiń eńbek sińirgen ártisi, soprano Marına Meşerıakova iriktedi. Galına Vıshnevskaıanyń Operalyq án salý ortalyǵy orkestriniń súıemeldeýimen Súndet Baıǵojın Dj. Rossınıdiń «Sevılskıı tsırıýlnık» operasynan Fıgaronyń «Largo al factotum...» kavantınasyn jáne «Rodına» (áni: S. Týlıkov, sózi: ıÝ. Polýhın) týyndysyn oryndady.
«Astana Operanyń» jetekshi solısi bul joly ádil qazylar alqasyn tánti ete almady, olar Tıgran Oganıan, Ksenııa Nesterenko jáne ıÝrıı Gorodetskııdi tańdady. Atalǵan ánshiler 26 jeltoqsan kúni Úlken teatrynda ótetin joba fınalyna qatysady. «Bolshaıa operanyń» kezekti jeńimpazyn telekórermender sms-daýys berý arqyly anyqtaıdy.
«Bolshaıa opera» 2016 jyly 8 qazanda teleefırde jaryq kórdi. Jobada álemniń 7 elinen kelgen 12 vokalıst baq synasty. Ár baǵdarlamada bir qatysýshy shyǵarylyp otyrdy. Qazaqstandyq barıton birden qazylar alqasynyń oń baǵasyn alyp, kórermennniń yqylasyna bólendi. Ol oryndaǵan Ahmet Jubanov pen Latıf Hamıdıdiń «Abaı» operasynyń Abaı partııalaryn eń úzdik nómir dep aıtýǵa bolady.
Súndettiń jankúıerleri ádil qazy alqasynyń sheshimimen kelispedi. «Súndettiń fınalǵa ótpeı qalǵany ókinishti. Daýsy qandaı keremet! Joba boıy soǵan daýys berip edim. Oǵan sáttilik tileımin!», - dep jazdy «VKontakte» jelisinde Irına Karlova. «Súndetpen qoshtasqanda, kózime jas keldi. Júregimdi julyp alǵandaı! Súndettiń daýysy óte keń! Ol qurmetke laıyq», - dedi Angelına Kovaleva.
«Ketetin adamdar kóp, fınaldyń aldynda ketken árıne, qıyn. Qalaı bolǵan kúnde de men Súndetke onyń úlken baspaldaqtardan kóterile berýin, jeke ómirine baqyt jáne kóp jaqsylyqtar tileımin. Týlıkovtyń áni óte qatty áser etti. Onyń tańdaýyna rızamyn. Jaǵdaı osylaı boldy eken dep qajymasyn. Bul mıllıondaǵan kórermenderi bar joba, teńdessiz tájirıbe. Jolyń bolsyn, Súndet!»,-deıdi Aleksandra Savrova.
«Bolshaıa opera» jobasy jas operalyq ánshilerge arnalǵan jalǵyz kásibı televızııalyq baıqaý. Onyń basty maqsaty - daryndy vokalısterdiń arasynan jańa esimder shyǵarý jáne olardyń keń tanylýyna múmkindik jasaý. «Bolshaıa opera» jobasynyń alǵashqy úsh maýsymy kórermender úshin úlken qyzyǵýshylyq týdyrdy.
Reseıliktermen qatar jobaǵa Germanııa, Avstrııa, Mońǵolııa, Armenııa, Belarýs, Qazaqstan, Ózbekstan jáne Ázerbaıjan ónerpazdary da qatysty. Olardyń árqaısysy óz elderindegi opera óneri boıynsha qalyptasqan dástúrdi pash etti.
Aıta keteıik, 2014 jylǵy maýsymnyń jeńimpazy «Astana Opera» Memlekettik opera jáne balet teatrynyń ánshisi Saltanat Ahmetova bolatyn.
