Súndet Baıǵojın «Astana Operanyń» jetekshi solısi qyzmetinen ketti

NUR-SULTAN. QazAqparat - «Astana Opera» jetekshi solıspen qosh aıtysty. Súndet Baıǵojın endi «Astana Opera» teatrynyń jetekshi solısi emes, dep habarlaıdy QazAqparat teatrdyń baspasóz qyzmetine silteme jasap.

27 qańtardan bastap «Astana Opera» men jetekshi solıs arasyndaǵy eńbek kelisimsharty Qazaqstan Respýblıkasy eńbek kodeksiniń 50-baby boıynsha buzyldy.

- Vokalıspen eńbek shartyn buzý týraly sheshim qabyldandy, sebebi birlesken qyzmet tıimdi emes, - dep atap ótti «Astana Opera».

Eske sala keteıik, QR EK 50-baby jumyskerge eńbek shartymen mólsheri anyqtalatyn ótemaqy tóleýmen taraptardyń kelisimi boıynsha shartty buzýdy kózdeıdi.

Súndet Baıǵojın 2013 jyldan bastap osy ýaqytqa deıin teatrda jetekshi solıst laýazymyn atqardy.

Óziniń teatrlyq mansabyn ol 2007 jyly Kúlásh Baıseıitova atyndaǵy Ulttyq opera jáne balet teatrynyń solısi bolyp bastady.

- Ánshi teatrdyń trýppasymen birge birneshe ret gastroldik týrlarǵa shyǵyp, repertýarlyq spektaklderde basty partııalardy oryndady. «Astana Opera» ujymy Qazaqstannyń eńbek sińirgen qaıratkeri Súndet Baıǵojınge barlyq bastamalaryna tabys, josparlarynyń júzege asýy men shyǵarmashylyq órleý tileıdi, - dedi «Astana Opera» ákimshiligi.

Elimizdiń basty teatrynyń opera trýppasynyń quramynda qazaqstandyq opera sahnasynyń juldyzdary – Qazaqstannyń eńbek sińirgen ártisi Jannat Baqtaı, aty ańyzǵa aınalǵan La Skala teatrynda taǵylymdamadan ótken Qazaqstannyń eńbek sińirgen qaıratkerleri Dına Hamzına men Jupar Ǵabdýllına; Bolshaıa Opera-2017 televızııalyq jobasynyń jeńimpazy Saltanat Ahmetova, ıtalıandyq kórermenniń kózaıymy Medet Chotabaev, Janat Shybyqbaev jáne t.b. óner maıtalmandary bar ekenin atap ótken jón.

Ártisterdiń barlyǵy jumysqa qabyldanar aldynda konkýrstyq irikteýden ótedi ári únemi halyqaralyq ádil qazylar aldynda óz biliktilikterin rastaıdy. Osylaısha, 2020 jyly solıster kezekti ret attestattaýdan ótedi.

- Shyǵarmashylyq ujym tabıǵı tas tárizdi, jyl ótken saıyn jetilip, naǵyz asyl tasqa aınala otyryp, shyńdalady. Biz barlyq qyrynan daryndy adamdarmen yntymaqtastyqta jumys jasaımyz. Ártisterimizben sheberlik sabaqtaryn ótkizý úshin túrli elderden, elimizdiń ár qıyrynan has sheberler, koýchtar keledi. Bul – teatrymyzǵa degen qyzyǵýshylyqtyń kórsetkishi, - dep atap ótti «Astana Opera» MOBT basshylyǵy.