Sýn Veıdýn: Qytaı men Ortalyq Azııa arasyndaǵy yntymaqtastyqtyń bolashaǵy aıqyn
ASTANA. KAZINFORM – Elordada Prezıdenttik ortalyqta «Ortalyq Azııa men Qytaı yntymaqtastyǵy jáne damýy» forýmy, sondaı-aq ІІІ «Jibek joly» halyqaralyq kommýnıkatsııalyq konferentsııasy ótip jatyr.
Forým aıasynda uıymdastyrylǵan «Qytaı – Ortalyq Azııa taǵdyrlas qaýymdastyǵyn qurý, jahandyq ózgeristerge birlesip tótep berý» atty taqyryptyq sessııada Qytaı – Ortalyq Azııa mehanızmi hatshylyǵynyń basshysy Sýn Veıdýn sóz sóıledi.
Ol baıandamasynda aımaqtyq baılanys pen azamattar arasyndaǵy túsinistiktiń mańyzdylyǵyna toqtalyp, ásirese jastar arasyndaǵy dostyqty Qytaı – Ortalyq Azııa yntymaqtastyǵynyń myzǵymas negizi retinde atap ótti.
Sýn Veıdýnnyń aıtýynsha, Qytaı men Ortalyq Azııa halyqtarynyń dostyǵy myńdaǵan jyldarǵa sozylǵan tarıhı sabaqtastyqqa ıe. Búgingi tańda bul qatynastar «Bir beldeý, bir jol» bastamasynyń aıasynda jańa deńgeıge kóterilip otyr.
– Baılanys tek ınfraqurylym arqyly ǵana emes, eń aldymen, júrek pen sana arqyly júzege asady. Shyn máninde, adamdar arasyndaǵy senim men túsinistik – kez kelgen seriktestiktiń uzaqmerzimdi kepili, - dedi ol.
Sýn Veıdýn jaqynda Qytaıdyń Sıan qalasynda Qytaı – Ortalyq Azııa Sıan sammıtiniń eki jyldyǵyna oraı uıymdastyrylǵan kezdesýdi eske aldy.
Onda Qytaıda bilim alyp jatqan Ortalyq Azııa elderiniń stýdentterimen júzdesip, olardyń oı-pikirlerin tyńdaǵanyn erekshe tebirenispen baıandady.
– Jastar – bolashaqtyń berik irgetasy. Olar ómirsheń ıdeıalarymen, shynaıy áńgimelerimen júrekti jylytyp, Qytaı men Ortalyq Azııa arasyndaǵy dostyqty jańa deńgeıge kóterýge yntaly ekenderin kórsetti. Olardyń boıynan ózara qoldaýǵa, ortaq damý men órkendeýge degen shynaıy umtylysty kórdim. Men sol kezdesýden keıin Qytaı men Ortalyq Azııa arasyndaǵy yntymaqtastyqtyń bolashaǵy aıqyn, senimdi ekenine taǵy bir márte kóz jetkizdim. Bul – ortaq taǵdyrly halyqtar arasyndaǵy shynaıy seriktestik, - dedi Sýn Veıdýn.
Sóziniń sońynda Sýn Veıdýn alty memleket birlese otyryp ózara baılanysty odan ári tereńdetip, bilim men mádenıet salalaryndaǵy almasýdy kúsheıtý arqyly berik, gúldengen, senimdi Qytaı – Ortalyq Azııa taǵdyrlas qaýymdastyǵyn birge qalyptastyrýǵa shaqyrdy.