Sýmoda qazaq kúresiniń jambas ádisin jıi qoldanamyn - Ersin Baltaǵul

ASTANA. KAZINFORM – Japonııada el namysyn qorǵap júrgen kásipqoı sýmoshy Ersin Baltaǵul qazaqstandyq sportshylarmen jáne jas balýandarmen júzdesti.

Kezdesýge qazaq kúresiniń túıe balýandary men Qazaqstan Barysy týrnıriniń jeńimpaz-júldegerleri – Beıbit Ystybaev, Rýslan Ábdirazaqov, Muhıt Tursynov, Erasyl Qajybaev, sondaı-aq Parıj Olımpıadasynyń qola júldegeri Ǵusman Qyrǵyzbaev bastaǵan dzıýdo quramasynyń sportshylary qatysty.

Shara barysynda jas balýandar qadirmendi qonaqqa tól kúresimizdiń ádis-tásilderin kórsetip, sýmo men qazaq kúresiniń úndestigin pash etti. Ersin Baltaǵul óz kezeginde sýmoda jıi qoldanatyn ádisterin tanystyryp, tájirıbesimen bólisti.

– Kásipqoı sporttaǵy tabysymnyń kilti – eńbek, tártip jáne ulttyq negizden ajyramaý. Men qazaq kúresi men dzıýdo mektebinen qalyptastym. Japondarda «Ondýoshın ı» degen uǵym bar, ıaǵnı zaldyń rýhyn seziný. Men de kilem men zaldyń tynysyn sezinýdi tól kúresimizdiń mektebinen úırendim. Buǵan mysal keltiretin bolsam, sýmo beldesýlerinde qazaq kúresiniń «Jambas» ádisin jıi qoldanamyn, – dedi sportshy.

Shara sońynda Qazaq Kuresi qaýymdastyǵynyń bas dırektory Meıirjan Bereketov Ersin Baltaǵulǵa qurmet kórsetip, ıyǵyna qazaqy dástúrmen shapan jaýyp, estelik kádesyı tabystady.

Kezdesý jas sportshylar úshin úlken motıvatsııaǵa aınalyp, ulttyq rýh pen halyqaralyq tájirıbeniń toǵysqan taǵylymdy sáti boldy.

Aıta keteıik, buǵan deıin Ersin Baltaǵul Jibek Joly telearnasynyń «Bugin LIVE» baǵdarlamasynda sporttaǵy joly, Japonııadaǵy ómiri jáne el namysyn qorǵaýdaǵy jaýapkershiligi týraly aıtty.