«Summer Jazz Astana» kontsertinde aty ańyzǵa aınalǵan juldyzdar án shyrqaıdy
ASTANA. QazAqparat - Búgin saǵat 17.00-de Kongress-Hollda «Summer Jazz Astana» djaz mýzykasynyń kontserti ótedi. Djaz stılindegi mýzyka juldyzdary atalmysh merekeniń qatysýshylary men qonaqtary bolmaq, dep habarlady astana.gov.kz.
Kontsertke aty ańyzǵa aınalǵan Level 42, eýropalyq tanymal djaz ujymy Mezzoforte óner kórsetedi. Bul festıval Qala kúnin merekeleý aıasynda ótkiziletin eń tanymal mádenı oqıǵa retinde este qalmaq.
Kontserttiń basty qonaqtarynyń biri búkil álemge 30 mıllıon jazbasyn satqan, 18 ánjınaǵy ári 40 úzdik hıtteriniń jıyrmasymen áıgili, Ulybrıtanııadaǵy eń yqpaldy top sanalatyn, atyshýly «Level 42» tobynyń negizin qalaýshy Mark Kıng. Sharanyń taǵy da bir qonaǵy tanymal eýropalyq djaz ujymy «Mezzoforte» toby. Italıan tilinen aýdarǵanda «Mezzoforte» - «asa qatty emes» degen maǵyna beredi. Buǵan atyshýly toptyń mıllıondaǵan tyńdarmandary «alaıda óte sapaly» degen baǵa berýde.
