Sý mınıstri: Qulsarynyń irgesindegi Jem ózenine bıyl da byltyrǵydaı sý keledi
ASTANA. KAZINFORM — Byltyr tasqynnan qatty zardap shekken Qulsary qalasyna bıyl sýdan qaýip bar ma? Sý resýrstary jáne ırrıgatsııa mınıstri Nurjan Nurjigitovke vedomstvonyń májilis alqasynan keıin jýrnalıster osyndaı suraq qoıdy.

Mınıstrdiń aıtýynsha, Qulsarynyń irgesindegi Jem ózeninen bıyl da mol sý keledi.
— Byltyr jaǵany bekemdeý jumystaryna 6 mlrd teńgeden astam qarajat bólindi. Ol aqshaǵa Jemniń arnasyn arshyp, jaǵasyn bekemdeý jumystary atqaryldy. Ózen arnasynyń 90 shaqyrymyn tazalaý kerek bolǵan. Qazir sonyń 85 shaqyrym tazalandy, — dedi ol.

Vedomstvo basshysy turǵyndardy tasqynnan qorǵaıtyn bóget áli tolyq salynyp bitpegenin atap ótti.
— Odan bólek arnaıy damby soǵylyp jatyr. Onyń 40 shaqyrymy daıyn. Bul 70-75 paıyzy degen sóz. Qalǵanyn aıaqtaýymyz kerek. Jem ózeni boıynsha keshe ǵana naqty boljam aldyq. Bıyl qalyptasatyn sýdyń kólemi byltyrǵy kólemge sáıkes keletin túri bar. Jergilikti ákimdikpen, tótenshe jaǵdaı qyzmetimen birge soǵan daıyndyq jumystaryn júrgizip jatyrmyz, — dedi Nurjan Nurjigitov.
Eske salsaq, byltyr Atyraý oblysyndaǵy Qulsary qalasynda sý tasqynynan zardap shekkender úshin tutas bir jańa shaǵyn aýdan salynǵan bolatyn.