Sýmen jabdyqtaý jobalyq qujattamalarynyń sapasyna nazar aýdarý qajet
ASTANA. QazAqparat - Sýmen jabdyqtaý jobalarynyń qunyna, jobalyq-smetalyq qujattamalardyń sapaly túrde ázirlenýine erekshe nazar aýdarý qajet.
Bul týraly búgin QR Parlamenti Májilisiniń depýtaty Nurtaı Sabılıanov aıtty, dep habarlaıdy QazAqparat.
«Resmı derekterge sáıkes, 2017 jyldyń 1 shildesine deıin 2930 aýyldyq meken ortalyqtandyrylǵan sýmen jabdyqtalmaǵan. Onyń ishinde halyq sany 200 adamnan az aýyldar sany 1326, ıaǵnı 45 paıyzyn quraıdy. Árbir úıdiń, árbir turǵynnyń sapaly aýyz sý alý múmkindigi bolý úshin osyndaı aýyldarda sý beretin keminde 2 sý jınaý uńǵymasyn ornatý ońtaıly bolar edi nemese toptyq sý qubyry aýyl janymen ótetin bolsa, onda ony oǵan qosý kerek. 2 sý uńǵymasyn ornatýdyń ortasha quny 40 mln teńge dep eseptesek, halqynyń sany 200 adamnan az aýyl turǵyndaryn aýyz sýmen qamtamasyz etý tutastaı alǵanda 53 mlrd teńge bolady. Al endi halqynyń sany 200 adamnan asatyn 1604 aýylǵa qatysty aıtar bolsaq, olarǵa sý qubyry jelilerin júrgizý shamamen 320 mlrd teńge qajet bolady eken», - dedi ol.
Osy rette onyń aıtýynsha, 2017-2018 jyldary atalǵan aýyldardyń keıbireýlerine bıýdjet qarajaty qarastyrylǵan. Jalpy respýblıkalyq 2930 aýyldyq eldi mekenderin sapaly aýyz sýmen qamtamasyz etý úshin memlekettik bıýdjetten 373 mlrd teńge qajet.
«Salystyrý úshin ýákiletti organnyń derekteri boıynsha 2930 aýyldyq eldi mekendi ortalyqtandyrylǵan sýmen qamtamasyz etý úshin jalpy qajettilik 1 trln teńgeni quraıdy. Bul jerde bólinetin bıýdjet qarajaty maqsatyna saı jáne tıimdi túrde paıdalanylýy tıis. Sondaı-aq sýmen jabdyqtaý jobalarynyń qunyna, jobalyq-smetalyq qujattamalardyń sapaly túrde ázirlenýine erekshe nazar aýdarý qajet. Sebebi keıbir sýmen jabdyqtaý jobalaryn salystyrǵan kezde bir óńirde bir shaqyrym sý qubyry jelisiniń quny 10 mln teńgeden 50 mln teńgege deıin bolyp otyr. Sondyqtan sýmen jabdyqtaý jobalary qunynyń negizsiz kóterilýine jol bermeý úshin tıisti baqylaý bolýy kerek. Sonymen birge oblystardyń sýmen jabdyqtaý deńgeıin negizge ala otyryp, sýmen jabdyqtaý jobalaryn qarjylandyrýdy kóbeıtý aýyldardy taza aýyz sýmen qamtýdy arttyrady», - dedi Nurtaı Sabılıanov.
