Sýmen jabdyqtaý jobalaryna otandyq materıaldar paıdalaný kerek - Úkimet basshysy
«Taǵy bir mańyzdy mindet kárizdik tazartý qurylystaryn salý jáne jańǵyrtý bolyp tabylady. Bul máseleni sheshýdiń tásilderi bar, qarjylandyrý kózderi anyqtaldy, jobalaý qujattamasy daıyndalyp jatyr. Osy jumystardy jyldam aıaqtap, jobalardy iske asyrýǵa kirisý kerek. Sýmen jabdyqtaý jáne sý burý jobalaryn iske asyrý kezinde jobalaý-smetalyq qujattamanyń tıptik jobalaryn, otandyq óndirýshilerdiń materıaldaryn paıdalaný qajet. Bul jobalardyń shyǵyndaryn qysqartyp qana qoımaı, jergilikti qamtýdy damytýǵa múmkindik beredi», - dedi Asqar Mamın.
Osy oraıda Úkimet basshysy jalpy memlekettik organdar qabyldap jatqan sharalardy qoldaýǵa bolady dep esepteıtindigin aıta kele birqatar máselege nazar aýdartty.
«Birinshi. Indýstrııa mınıstrligine ákimdermen birlesip, osy jyldyń qorytyndysy boıynsha qalalar men aýyldarda ortalyqtandyrylǵan sýmen jabdyqtaý boıynsha josparlanǵan kórsetkishterdiń oryndalýyn qamtamasyz etýdi tapsyramyn. Ekinshi. Ekologııa mınıstrligi toptyq sý qubyrlaryn basqarý júıesin odan ári jetildirý boıynsha sharalar qabyldap, olardy salý jáne rekonstrýktsııalaý jobalaryn ýaqtyly iske asyrýdy qamtamasyz etsin. 2021 jyldyń sońyna deıin 197 myń turǵyny bar 38 eldi mekenge sý júrgizýdi kózdeıtin, uzaqqa sozylǵan úsh jobanyń qurylysyn aıaqtaý qajet. Úshinshi. Indýstrııa, Ulttyq ekonomıka, Qarjy, Ekologııa, Densaýlyq saqtaý mınıstrlikteri halyq úshin tarıfterdiń artýyna jol bermeý úshin kárizdik tazartý qurylystaryn salý jáne rekonstrýktsııalaý jobalaryn iske asyrý tetigin zań júzinde bekitýdi qamtamasyz etsin, qaryzdarǵa qyzmet kórsetý men óteýdi eskerý qajet», - dedi Premer-Mınıstr.
