Sýmen jabdyqtaý jobalaryn iske asyrý barysynda bıýdjetten 300 mlrd. teńge únemdeldi - QR AShM
ASTANA. 8 qazan. QazAqparat - Sýmen qamtamasyz etý jobalaryn iske asyrý barysynda bıýdjet shyǵystaryn ońtaılandyrý arqyly 302 mlrd. 834 mln. teńge únemdeldi.
Bul týraly búgin Aýyl sharýashylyǵy mınıstrliginde ótken brıfıngte vedomstvonyń Sý resýrstary komıtetiniń tóraǵasy Islam Ábishev málim etti.
Onyń aıtýynsha, komıtet qyzmetkerleri jobalardy saraptaý kezinde shyǵystardy 5-6 esege qysqartýǵa qol jetkizgen. Bul, eń birinshiden, eldi mekenderdiń naqty qansha sýǵa zárý ekenin anyqtaýdan keıin múmkin boldy. Máselen, kóptegen aýyldaǵy halyq sany men mal basy artyǵymen kórsetilgen bolyp shyqty. Odan ózge, sý qubyrlarynyń dıametrleri 1000 mıllımetrden 500 mıllımetrge deıin kishireıtildi. Sý qubyrlaryn júrgizý úshin qubyrdy kóterme baǵamen satyp alatyn «Qazsýsharýashylyǵy» RMK bas merdiger bolyp belgilendi.
Sondaı-aq, I. Ábishev kóptegen jaǵdaılarda aýyz sýmen qamtamasyz etý nysandary men gıdrotehnıkalyq qurylymdarǵa arnalǵan qurylǵylar birneshe ese qymbat baǵamen satyp alynyp kelgenin de basa aıtty.
Osylaısha qurylǵylardy tikeleı jetkizýshilermen jasyryn túrde kelisim jasalyp, bıýdjet qarjysyn qymqyratyndardyń joly kesildi.
Komıtet tóraǵasynyń aıtýynsha, Q. Sátbaev atyndaǵy kanaldyń bas dırektory da dál osyndaı jolmen bıýdjet qarajatyn jymqyrýdy josparlaǵany úshin qyzmetinen qýyldy.
