Sýmen jabdyqtaý jáne sý burǵysh nysandaryn jobalaýda jobalyq-smetalyq qujattamany kóbinese tájirıbesi joq uıymdar ázirleıdi - S.Nokın
ASTANA. Shildeniń 13-i. QazAqparat /Marlan Jıembaı/ - Sýmen jabdyqtaý jáne sý burǵysh nysandaryn jobalaýda jobalyq-smetalyq qujattamany kóbinese tájirıbesi joq uıymdar ázirleıdi.
Bul týraly búgin Úkimet otyrysynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın málim etti.
Bul oraıda agenttik tóraǵasy birqatar mysaldy Úkimet músheleriniń nazaryna usyndy. Máselen, onyń atap ótýinshe, «Qaraǵandyqalajoba» JShS-niń jobalaýǵa qatysty barlyq jumystardy atqarýǵa lıtsenzııasy bar. Alaıda onyń shtatynda bar-joǵy 4 adam bolsa, onyń biriniń, ıaǵnı sýmen jabdyqtaý jáne sý burǵysh bóliminiń jobalaý jónindegi bas mamanynyń mamandyǵy ekolog. Jobalaý sheberhanasy turǵyn úı páterleriniń birinde ornalasqan. Al «Pavlodar oblysy Maı toptyq sý burǵyshyn qaıta qalpyna keltirý» jobasyn beıinine jatpaıtyn «Qazelektromontaj» AQ oryndaǵan. Bul oraıda tapsyrys berýshiniń jobalaý tapsyrmasyn qate bergendigin atap ótken S.Nokın, «sý qory rastalmaı jobalanǵan, bul asa dóreki qatelik bolyp tabylady. Joba boıynsha 159 eskertpe anyqtaldy jáne búginge deıin ol ázirlengen joq», dedi.
Qazirgi ýaqytta elimizde jobalaý jumystaryn júrgizýge 12 myń lıtsenzııa berilgen. Degenmen 50-ge jýyq kásiporyn ǵana sýmen jabdyqtaý nysandaryn jobalaýǵa mamandanǵan ári jaqsy óndiristik bazasy men bilikti mamandary bar.
