Sýmen jabdyqtaý salasyndaǵy memlekettik retteý júıesi jetile túsedi - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine sýmen jabdyqtaý jáne sý burý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Atalǵan zań jobasy sýmen jabdyqtaý jáne sý burý salasyndaǵy memlekettik retteý júıesin jetildirý maqsatynda ázirlengen. «Bul rette Sý kodeksine eldi mekenderdegi sýmen jabdyqtaý jáne sý burý salasyndaǵy qatynastardy naqtylaıtyn jańa uǵymdar engiziledi. Sý zańnamasyndaǵy sý burý jáne sýmen jabdyqtaý salasynyń quqyqtyq qatynastaryna qatysýshylar múddeleriniń balansyn qamtamasyz etý bóligindegi maqsattar naqtylanady. Budan bólek, energııa jáne sý únemdeý tehnologııalaryn damytýǵa basymdyq berý úshin sharttar qarastyrylady», - dedi zań jobasy boıynsha baıandaǵan Ulttyq ekonomıka mınıstri Erbolat Dosaev.
Onyń aıtýynsha, qujat boıynsha eldi mekenderdi sýmen jabdyqtaý júıelerin uıymdastyrý máseleleri retteledi. Aýyz sýmen jabdyqtaý men kárizder, olardyń quramdas bólikterin ıesiz, qaraýsyz sanatqa jatqyzý tártibi aıqyndalyp, olar esepke alynady. Al Sý kodeksinde sýmen jabdyqtaý jáne sý burý salasyndaǵy tutynýshylardyń quqyqtary men mindetteri aıqyndalady.
Budan bólek, zań jobasynda energııa men sýdy únemdeý, aýyz sýdy tıimdi paıdalaný talaptaryn negizge ala otyryp, sýdy kommertsııalyq esepteý aspaptaryn mindetti túrde ornatýǵa qatysty naqtylaıtyn normalar engizilip otyr.
