Sýmen jabdyqtaý qyzmetin mınıstrlikter arasynda bólýdiń qajeti joq - depýtat

ASTANA. QazAqparat - Sýmen jabdyqtaý qyzmetin mınıstrlikter arasynda bólýdiń qajeti joq. Mundaı pikirdi  búgin QR Parlamenti Májilisiniń depýtaty Sáken Ótebaev bildirdi, dep habarlaıdy QazAqparat.

«Aýyz sýmen qamtamasyz etý salasyndaǵy qyzmetterdiń shashyrańqylyǵy  problema bolyp otyr. Sonyń saldarynan jobalardy júzege asyrý barysynda ókiletti organdardyń arasynda úılesimdilik joq. Máselen, jer ústi sý kózderi men toptyń sý taratqyshtarǵa QR Aýyl sharýashylyǵy mınıstrligi, al jer asty sý kózderi men  eldi mekenderdi sýmen jabdyqtaý júıesin damytýǵa QR Investıtsııalar jáne damý mınıstrligi jaýap beredi. Buǵan qosa, josparlaý, salý jáne odan ary paıdalaný jergilikti atqarýshy organdardyń quziretinde qalyp otyr», - dedi depýtat.

Osy rette Sáken Ótebaev barlyq qyzmetshilerdi bir memlekettik organǵa shoǵyrlandyrý máselesin qarastyrýdy usyndy. Mundaı shara eldi mekenderde sýmen jabdyqtaý júıesin paıdalaný, jobalaý, salý jáne qaıta jańǵyrtý barysyndaǵy barlyq máselelerdi qamtýǵa múmkindik beredi.

Aıta keteıik, QR Parlamenti Májilisinde elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý ótti. Sharaǵa Májilis Tóraǵasy Nurlan Nyǵmatýlın, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov, Qarjy mınıstri Baqyt Sultanov, Investıtsııalar jáne damý mınısti Jeńis Qasymbek, múddeli memlekettik organdardyń, ǵylymı-zertteý ınstıtýttarynyń ókilderi qatysty.