Sýmen jabdyqtaý ınfraqurylymdaryn damytýda zamanaýı tehnologııalardy paıdalaný qajet
ASTANA. QazAqparat - Sýmen jabdyqtaý ınfraqurylymdaryn damytý úshin zamanaýı tehnologııalardy paıdalaný qajet. Bul týraly búgin QR Parlamenti Májilisiniń Tóraǵasy Nurlan Nyǵmatýlın aıtty, dep habarlaıdy QazAqparat.
Elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý barysynda Májilis Tóraǵasy halyqty sapaly aýyz sýmen qamtamasyz etý qandaı talaptarǵa saı bolýy kerektigin atap ótti.
«Halyq sapasyna kepil bar aýyz sýdy kúni-túni jáne shekteýsiz alý múmkindigine ıe bolýy tıis. Bul - 21 ǵasyr talaby. Bizdiń azamattarymyz qaı jerde bolsa da, aýylda nemese qalada turyp jatsa da dál osyndaı shekteýsiz mólsherde kúni-túni qamtamasyz etilýi qajet. Tarıfter ádil bolýmen qatar sýdy tazalaý jáne bólý shyǵyndaryn qamtamasyz etýge jetkilikti bolýy tıis», - dedi ol.
Onyń aıtýynsha, tarıf halyqtyń áleýmettik az qamtylǵan toby úshin qoljetimdi bolmaǵan jaǵdaıda sýbsıdııalaý nemese ataýly kómek kórsetý qajet.
«Tutynýshylarǵa qyzmet kórsetýdiń joǵary deńgeıi óte mańyzdy talap sanalady. Árıne, bul rette bizdiń sý resýrstarymyzdy tıimdi paıdalanýda da úlken máseleler bar. Elimizdiń óńirlerinde tarıfteý jáne ózge quraldar arqyly qol jetkizdiń aıqyn mysaldary bar», - dedi Májilis Tóraǵasy.
Onyń sózine qaraǵanda, atalǵan óńirlerde aýyz sý jáne sharýashylyqqa qajetti sý retinde bólek-bólek beriledi.
«Mynadaı ustanym engizilýi tıis: tutynýshy alǵan qyzmetine ádil baǵa tólegen kezde ol sáıkesinshe laıyqty qyzmet alýy qajet. Sýmen jabdyqtaý ınfraqurylymdaryn turaqty damytý, onyń uzaq ýaqyt qyzmet kórsetýi men tıimdiligin qamtamasyz etý úshin zamanaýı tehnologııalar men materıaldardy belsendi paıdalaný qajet. Bul talaptardyń barlyǵyn júzege asyrý laıyqty deńgeıde qoǵamdyq monıtorıng bolǵanda ǵana júzege asyrylady», - dedi ol.
