Sýmen jabdyqtaý eseptegish quraldaryna qoıylatyn talaptar bekitildi
ASTANA. KAZINFORM – Eldi mekenderdiń sýmen jabdyqtaý jáne sý burý júıelerindegi sý eseptegish quraldaryn jáne júıelerin tańdaý, montajdaý jáne paıdalaný qaǵıdalaryna ózgerister men tolyqtyrýlar engizildi.
Tıisti túzetýler Ónerkásip jáne qurylys mınıstriniń buıryǵymen bekitildi.
Ózgerister derekterdi berýdiń biryńǵaı NB-IoT jelisin qamtamasyz etý talaptaryn belgileýdi jáne LoRaWAN tehnologııasyn qoldaný múmkindigin qarastyrady.
Engizilgen tolyqtyrýlar mynalardy qamtıdy:
— derekterdi qashyqtan jınaý jáne berý uǵymyn aıqyndaý;
— energııa tutynýdy esepke alýdyń avtomattandyrylǵan júıesin engizý;
— esepke alý quraldaryn ornatý ornyna, jumys isteý qaǵıdatyna jáne derekterdi berý tásiline qaraı jikteý (NB-IoT, LoRaWAN);
— esepke alý quraldaryn montajdaý, paıdalaný jáne kepildik merzimine qoıylatyn talaptar.
Jańartylǵan qaǵıdalar aqparattyq-ólsheý júıelerine jáne energııa tutynýdy esepke alýdyń avtomattandyrylǵan júıelerine derekterdi avtomatty túrde berýdi qamtamasyz etýge baǵyttalǵan.
— Sonymen qatar NB-IoT jelisiniń basymdyǵyn eskere otyryp, eseptegish quraldardy paıdalaný kózdelgen. Bul rette LoRaWAN tehnologııasyn qoldanatyn buryn ornatylǵan quraldar olardyń qyzmet etý merzimi aıaqtalǵanǵa deıin paıdalanylatyn bolady. Sondaı-aq eseptegish quraldarǵa keminde 5 jyldyq kepildik qyzmet kórsetý merzimi belgilendi, — delingen Ónerkásip jáne qurylys mınıstrliginiń habarlamasynda.
Aıta ketelik 2030 jylǵa deıin sýmen jabdyqtaý salasynda derekter 100 paıyz onlaın beriletini týraly jazǵan edik.
