Sý men órt qaýpi: Aqtóbe oblysynyń qaýipsizdik pasporty jarııa talqyǵa shyqty
AQTÓBE. KAZINFORM — Aqtóbe oblysynda sý basý qaýpi joǵary 58 eldi meken bar. Al 114 eldi mekenniń memlekettik órtke qarsy qyzmeti joq. Aqtóbe oblysy aýmaǵynyń qaýipsizdik pasporty jarııa talqylaýǵa shyqty.
Aqtóbe oblysy ákimdiginiń saıtynda Aqtóbe oblysy aýmaǵynyń qaýipsizdik pasportynyń jobasy jarııalandy. Oblys ákiminiń baspasóz qyzmeti qazir qujat talqylaýǵa shyǵarylǵanyn habarlady. Qujattaǵy derekterge súıensek, 2024 jyldyń qarasha aıynda oblystyń halyq sany 939 myńnan asqan. Onyń 461 myńnan astamy er, 478 myńnan astamy áıel bolsa, 285 995 bala tirkeýli. Oblys turǵyndarynyń 235 myńnan astamy aýylda turady.
— Tasqyn jáne erigen sý basýǵa beıim 58 eldi meken bar. 2024 jyly Qobda, Oıyl, Yrǵyz, Temir, Muǵaljar, Áıteke bı aýdandarynda jáne Aqtóbe qalasynda jergilikti aýqymdaǵy TJ rejımi jarııalandy. Aqtóbe oblysynda seısmıkalyq aımaqtarda ornalasqan 5 eldi meken bar. Olar: Badamsha aýyly (Qarǵaly aýdany), Komsomol aýyly (Áıteke bı aýdany), 3) Mártók aýyly (Mártók aýdany), Yrǵyz aýyly (Yrǵyz aýdany) jáne Shalqar aýyly (Shalqar aýdany). Aqtóbe oblysy boıynsha 230 eski úı bar. Onyń 31-i apatty jaǵdaıda tur. 6 úıdiń máselesi sheshilse, qalǵan 25 kóppáterli apatty turǵyn úıge jeke ınvestorlardyń qyzyǵýshylyǵy joq. Qazirgi ýaqytta 25 kóppáterli apatty turǵyn úıdiń nemese 582 páterdiń turǵyndaryn rekvızıtsııalaý jolymen kezeń-kezeńimen (3 jyl) kóshirý úshin shamamen 5,766 mlrd teńge qajet, — dep jazylǵan qujatta.
Oblysta memlekettik órtke qarsy qyzmeti joq 114 eldi meken tirkelgen. Al 196 eldi mekende 73 órt sóndirý beketi, 14 órtke qarsy erikti qurylym bar. Qaýipsizdik pasportynda joldar jaıy da jazylǵan. Óńirdegi jol uzyndyǵy 6200 shaqyrymnan assa, onyń 1544 shaqyrymy, ıaǵnı 24,6% qanaǵattanarlyqsyz kúıde.
Aıta keteıik, Ashyq NQA portalynda áleýmettik azyq-túliktiń ekinshi toqsandaǵy shekti jarııa talqyǵa shyqty. Onda 19 taýardyń 13-inde baǵa ósimi bar.