Sýmen qamtamasyz etý salasynda bilikti mamandar tapshy - Halyqaralyq konferentsııa
ASTANA. 23 qańtar. QazAqparat - Búgin Astanada «Qazaqstandaǵy eldi mekenderdi sýmen qamtamasyz etý jáne sý burý júıelerin jobalaýdyń ózekti máseleleri» taqyrybyndaǵy halyqaralyq konferentsııada sýmen qamtamasyz etý kadrlaryn daıarlaýdy arttyrý kerektigi aıtyldy.
«Qazaqstandyq Sýarnajobasy» AQ prezıdenti Eldar Tabanovtyń sózine qaraǵanda, búginde elimizde osy salada bilikti mamandardyń tapshylyǵy sezilip otyr. «Bul salanyń mamandary tabysy joǵary sanattaǵy qyzmetkerlerge jatqyzýǵa bolady. Alaıda, bul baǵyttaǵy bilikti mamandarǵa suranys joǵary. Sondyqtan da jastar arasynda osy mamandyqty tańdaý kezinde atalǵan máseleler yntalandyrýshy tetik bolýy tıis», - dedi E. Tabanov.
Óz kezeginde L.N. Gýmılev atyndaǵy EUÝ Sáýlet-qurylys fakýltetiniń dekany, professor Talǵat Baıtasov qazirgi kezde tıisti memlekettik organdarmen jáne saladaǵy jobalaý óndiristik kásiporyndarmen birlesip sheshýge negizdelgen birqatar qordalanǵan máseleler bar ekenin atap ótti.
«Sońǵy birneshe jyldarda sýmen qamtamasyz etý jáne káriz mamandyǵy boıynsha bilim alýǵa nıetti stýdentter sanynyń tómendeýi baıqaldy. Ótken jyly osy problemaǵa taǵy bireýi qosyldy. Atap aıqanda QR Bilim jáne ǵylym mınıstrligi bekitken tıptik oqý josparynda «Qurylys» mamandyǵyndaǵy «Sýmen qamtatasyz etý jáne káriz júıesi» baǵyty enbeı qalǵan. Bul degenimiz ýnıversıtet atalǵan saladaǵy mamandardy 2014 jyldan daıarlaýǵa quqy joq degendi bildiredi», - deıdi dekan.
Onyń sózine qaraǵanda, osyǵan baılanysty bul salada mamandardy daıarlaýdy úzbeý úshin 2013 jyly joǵary oqý orny mınıstrlikke tıisti qujattar paketi usynyldy. Alaıda vedomstvo ýnıversıtettiń usynysyn quptamaǵan kórinedi.
Bul turǵyda konferentsııa barysynda QR ÓDM Qurylys isteri jáne turǵyn úı-kommýnaldyq sharýashylyǵy komıteti tóraǵasynyń orynbasary Asqar Smanqulov vedomstvo osy másele boıynsha qoldaý jasaýǵa daıyn ekenin atap ótti. Sonymen qatar ol osy salada Qazaqstandaǵy ǵylymı alańdarda granttar sanyn arttyrý mańyzdy ekenin jetkizdi.
