Sýmen qamtamasyz etý ınfraqurylymyna tolyq aýdıt júrgizý qajet - Asqar Shákirov
«Búgingi Úkimet saǵatynyń taqyryby - ár qazaqstandyq úshin asa mańyzdy jáne ulttyq qaýipsizdiktiń ajyramas bóligi sanalady. Adamdardyń ómir súrý sapasy men sý ekologııalyq júıeleriniń saqtalýy sapaly aýyz sýdyń qoljetimdiligine, gıdroqurylystardyń jaı-kúıine, sý resýrstaryn utymdy paıdalanýǵa tikeleı baılanysty. Osy jyldyń aqpan aıynda Prezıdent Qasym-Jomart Toqaev Ekologııa, geologııa jáne tabıǵı resýrstar mınıstrligine «sý resýrstaryn basqarý jónindegi tıisti baǵdarlamalardy ázirleý kezinde eldiń sý qaýipsizdiginiń barlyq aspektilerin muqııat taldaýdy» tapsyrdy. Qazirgi ýaqytta jańa ekologııalyq kodekstiń jobasy QR Parlamenti Májilisiniń qaraýynda jatyr. Memleket basshysynyń atalǵan tapsyrmasy osy qujatta tıisti kórinis tapty dep úmittenemiz«, - dedi Asqar Shákirov «Qazaqstannyń sý qaýipsizdigi: qazirgi kezdegi qaýip-qaterler jáne olardy sheshý perspektıvalary» taqyrybyna arnalǵan Úkimet saǵatynda.
Onyń atap ótýinshe, Qazaqstan sý tapshylyǵy bar memleketterdiń qataryna kiredi. Sý resýrstaryna qajettiliktiń ósýine baılanysty sýmen qamtamasyz etýdiń jyl sanap tómendeýi baıqalady.
«Esterińizde bolsa, bul máselelerdi biz ótken jyly parlamenttik tyńdaýda jan-jaqty talqyladyq. Eske sala keteıin, ol kezde sý qorlarynyń sarqylýy men lastanýy, transshekaralyq gıdrologııalyq qaýipter, aýyz sýmen qamtamasyz etý, sý ınfraqurylymynyń tozýy, sý resýrstaryn basqarýdyń jetilmegendigi, sý sharýashylyǵy úshin kadrlardyń jetispeýshiligi týraly aıtqan edik», - dedi ol.
Senat tóraǵasy orynbasarynyń aıtýynsha, Táýelsizdik jyldary sý máselelerin sheshýge tek baǵdarlamalyq qujattar aıasynda 790 mlrd teńgege jýyq memlekettik qarajat bólingen.
«Alaıda, kórip otyrǵanymyzdaı, aýyz sý jónindegi baǵdarlamalar aıtarlyqtaı nátıjelerdi bermedi. Ortalyqtandyrylǵan sýmen jabdyqtaý kózderinen aýyz sýmen qamtamasyz etý kórsetkishi Qazaqstan boıynsha 77 paıyzdydy qurady. Transshekaralyq sýdy paıdalaný máseleleri bizdiń elimiz úshin asa ózekti bolyp qalýda. Búginde sý resýrstarynyń tek 56 paıyzy Qazaqstanda, al 44 paıyzy Qytaımen, Reseımen, Qyrǵyzstanmen jáne Ózbekstanmen transshekaralyq ózender esebinen qalyptasatyny belgili. Bul saladaǵy halyqaralyq-quqyqtyq negiz qazirgi zaman shyndyǵyn eskere otyryp, odan ári ózektendirýdi talap etedi», - dedi Senat spıkeriniń orynbasary.
Sonymen qatar ol Qytaımen ortadaǵy problemalar Іle jáne Ertis ózenderi boıynsha aǵynnyń aıtarlyqtaı qysqarýy Balqash kóliniń sý deńgeıine jáne el ındýstrııasynyń negizin quraıtyn iri ónerkásiptik obektilerdiń jumysyna qaýip tóndiretindigin basa aıtty.
«Jekelegen máseleler sýarmaly kezeńde agrarlyq sektordyń jumys isteýi Ózbekstanmen jáne Qyrǵyzstanmen memleketaralyq ýaǵdalastyqtardyń jobalaryna qatysty bolyp otyr. Sý sharýashylyǵy obektileri men qurylystaryn tolyq aýqymdy pasporttaýdy júrgizý, olardyń tehnıkalyq jaı-kúıin esepke alý erekshe nazar aýdarýdy talap etedi. Sý resýrstaryna, ırrıgatsııalyq júıelerge jáne sýmen qamtamasyz etýdiń barlyq ınfraqurylymyna tolyq aýdıt júrgizý qajet», - dedi Asqar Shákirov.
