Sýma Chakabartı: Memleket pen azamattar arasyndaǵy áleýmettik «kelisimshartty» ózgertetin kez keldi
NUR-SULTAN. QazAqparat – Jańa áleýmettik kodeks qazaqstandyqtardyń jeke qabiletterine súıenip, óz betimen ómir súrýge daǵdylandyrý kerek. QR Prezıdentiniń Ekonomıkalyq damý máseleleri jónindegi keńesshisi Ser Sýma Chakrabartı «Ult múddesi» baǵdarlamasynda osyndaı oı aıtty, dep habarlaıdy QazAqparat tilshisi.
«Qarapaıym tilmeı aıtsaq, makroekonomıkalyq saıasattyń jańa tásilderin ázirleı otyryp, qarapaıym adamdardyń ómirin qalaı jaqsartýǵa, adamdardyń qajettilikterine jaýap beretin bank júıesin qalaı qurýǵa bolady degen saýaldarǵa jaýap izdeımiz. Qazir bank júıesi uzaq merzimge nesıe bere almaıdy. Nesıelerdiń merzimi tym qysqa. Áńgime uzaq merzimdi ınvestıtsııalar týraly bolyp otyr. Qazaqstan bankteri bul máselede qaýqarsyz. Ókinishke qaraı, bank sektorynda jumys istemeı turǵan, quny joq aktıvter óte kóp. Bank júıesin tazartý kerek, sonda ol adamdarǵa qajetinshe qyzmet kórsetetin bolady», - dedi Ser Sýma Chakrabartı.
Onyń aıtýynsha, ekonomıkanyń qarqynnyń ósýi de qajet.
«Búginde eńbek naryǵynda jastar úlesi artýda. Biz ósýdi qurý úshin jumys isteımiz. Áleýmettik salaǵa kelsek, munda da ózgeris kerek. Sońǵy 30 jylda kóptegen jańa naryqtarda Úkimettiń adamdardyń jeke ómirindegi róli joǵary boldy. Memleket pen azamattar arasyndaǵy áleýmettik kelisimshartty ózgertý kerek. Memleket budan ári bulaısha ómir súre almaıdy. Áıtpese, oǵan salyqtardy udaıy arttyryp otyrýǵa týra keledi. Bulaı bolmaǵany abzal. Eskishe oılaý júıesiniń kesirinen adamdar ózderi úshin sheshim qabyldaǵysy kelmeıdi. Adam qamyn jasaıtyn memleket bar deıtin túsinik sińip qalǵan. Bul jaýapkershilik árkimniń óz ıyǵyna aýysýy kerek. Qazir biz jańa Áleýmettik kodeks pen Zeınetaqy kodeksin jasap jatyrmyz. Bul adamdardyń jeke qabiletterin ashyp, olarǵa kóbirek erkindik berýi kerek. Qazir Úkimettiń áleýmettik saıasatynan tys jatqan adam joqtyń qasy. Bul óte kúrdeli jáne adamdarmen qarym-qatynasy sonshalyqty kúrdeli: kóptegen aýyr protsedýralar. Biz osy ahýaldy tepe-teńdikke keltirip, zańnamanyń adamnyń uzaqmerzimdi paıdasyna jumys isteıtin etip ózgertýge tyrysamyz» - dedi Sýma Chakrabartı.
