Sulýlyq salondary nege ashylmaıtynyn Almaty ákimdigi túsindirdi
ALMATY. QazAqparat – Almaty ákimdigi sulýlyq salondary jaqyn ýaqytta nege ashylmaıtynyn túsindirdi, dep habarlaıdy QazAqparat tilshisi.
Qazirgi ýaqytta sulýlyq ındýstrııasy nysandarynyń qyzmetine Almaty qalasy ákimdigi janyndaǵy tótenshe jaǵdaı rejımin qamtamasyz etý jónindegi jedel shtabtyń sheshimimen tyıym salynǵan.
«Karantın kezinde sulýlyq salondary qaýip-qater obektileri bolyp tabylady. Qyzmet kórsetý ereksheliginiń ózi (shash qııý, sándeý, shashty boıaý, manıkıýr jáne taǵy basqasy) sheber men klıent arasyndaǵy óte jaqyn (1 metrden kem) jáne uzaq (30-40 mınýt jáne odan kóp) baılanysty qarastyrady. Sheber aýyrǵan jaǵdaıda, barlyq klıentter jaqyn baılanys tizimine kiredi jáne aınalasyna qaýip tóndiredi»,– delingen ákimdik habarlamasynda.
Málim etilgendeı, epıdemıologııalyq jaǵdaı jaqsarǵan jaǵdaıda, salanyń osy túrin ruqsat etilgen qyzmet túrleriniń tizimine engizý týraly másele qaralatyn bolady.
Karantın rejımin buzǵany úshin ákimshilik jaýapkershilik qarastyrylǵan. Sanepıdqyzmet organdary tarapynan baqylaý kúsheıtiledi.
«Osyndaı buzýshylyqtardyń barlyq faktileri týraly aýdandyq Taýarlar men qyzmetterdiń sapasy men qaýipsizdigin baqylaý basqarmalaryna nemese tikeleı Almaty qalasy departamentine habarlaýdy suraımyz», – dep atap ótti ákimdikten.
