Sulýlyq álemdi qutqarady: Oralda halyqaralyq sýretshiler sımpozıýmy máresine jetti
Atalǵan sharany QR Mádenıet jáne sport mınıstrliginiń qoldaýymen «BatikKami» mádenı qory uıymdastyrdy.
Sımpozıým aıasynda sýretshiler kórmesiniń ashylý rásimine qatysqan QR mádenıet jáne sport vıtse-mınıstri Nurǵısa Dáýeshovtiń atap ótkenindeı, halyqaralyq deńgeıdegi bul is-shara 2018 jyldan beri ótkizilip keledi.
«Osy joly Eýropa men Azııany jalǵap jatqan Aq Jaıyq óńirinde uıymdastyrylǵan sımpozıýmǵa 20-ǵa jýyq sýretshi qatysty. Olar bes kún boıy Oralda sýretter saldy, óz tájirıbelerimen bólisip, óner jolyn tańdaǵan jergilikti jastar úshin sheberlik dáristerin ótkizdi. Jalpy, elimizdiń tarıhy men mádenıetin bederlep, máńgilikke qaldyrýda sýret óneriniń mańyzy zor», dedi N.Dáýeshov.
BQO ákiminiń orynbasary Baqytjan Narymbetov óneri men mádenıeti órkendegen óńirde halyqaralyq is-sharanyń ótýi sýretshilerge tyń serpin beretinin jetkizdi.
«BatikKami» mádenı qorynyń dırektory, Qazaqstan Sýretshiler odaǵynyń múshesi, mádenıet qaıratkeri Kamıla Japalovanyń aıtýynsha, dástúrli sımpozıýmǵa sheteldiktermen qatar ár óńirden sýretshiler shaqyryldy.
«Avtorlyq jobam aıasynda shara bir jyl buryn josparlanǵandyqtan, pandemııa da óz áserin tıgizdi. Áıtpese qatysýshylar sany budan da kóp bolar ma edi. Degenmen sonyń ózinde ár taraptan kelgen sýretshiler Oral qalasynyń baı tarıhy men mádenıetimen tanysyp, keremet týyndylar salyp úlgerdi. Qazaqstan Mádenıet jáne sport mınıstrligi aldaǵy ýaqytta da qoldaý bildirip, sımpozıým turaqty ótip turady degen oıdamyz», dedi K.Japalova.
Oralǵa alystan at sabyltyp kelgender arasynda Túrkııanyń Ankara qalasynda turatyn Zamıra Shahın, Ázerbaıjannan Ramına Saadathan, Ózbekstannan Sardor Allabergenov boldy. Sondaı-aq Jeńis Moldabekov, Sembiǵalı Smaǵulov, Dáýrenbek Beknazarov, Baqytnur Berdisbekov, Aınabek Ospanov, Oraldan Nurbek Járdemov sekildi qylqalam sheberleri qatysty.
«Bul – Oral qalasyna alǵash kelýim. Mýzeıler men tarıhı oryndardy aralap, Jaıyq ózeni jaǵasynda sýretter saldyq. Ásirese, Mánshúk Mámetova mýzeıi erekshe áser qaldyrdy. Ádette qyz balaǵa qamshy syılamaıdy. Mýzeı qyzmetkerleriniń sózine qaraǵanda, bir aqsaqal qarshadaıynan qaısarlyǵymen kózge túsken Mánshúkke 12 jasynda qamshy tartý etken eken, sol qundy jádiger retinde saqtalyp tur. Mine, sonyń áserimen «Oraldan ushqan qarlyǵash» degen sýret saldym. Onda Mánshúktiń erlik rýhyn kórsetkim keldi. Shapqan at, ushqan qarlyǵash, alapat soǵystyń kórinisindeı órtengen aǵash, sondaı beıneler kórinis tapqan. Bıyl qazaqtyń batyr qyzynyń týǵanyna 100 jyl tolady eken. Bolashaqta da Mánshúkke arnap jumystar sala jatarmyz dep oılaımyn. Ózim, jalpy, keskindeme baǵytynda eńbektenemin. Elorda, Pavlodarda turǵanda salǵan týyndylarym da barshylyq, qazir Almatydamyn. Osyǵan deıin Aq Jaıyqtan túlep ushqan aqıyq aqyn Juban Moldaǵalıevtiń 100 jyldyǵyna arnalǵan «Qııal qanaty» respýblıkalyq dýet (poezııa men sýret) onlaın baıqaýynyń bas júldesin jeńip aldyq. Sondaı-aq Kıprde jeke kórmem ótti, halyqaralyq sımpozıýmdarǵa da qatysyp kelemin. Eń bastysy, sýretshiler jınalyp, bir-birimizben tájirıbe almastyq, shabyttandyq, Qazaqstannyń keremet jerleri kóp ekenine kózimiz jete tústi», dedi QazAqparat tilshisine sýretshi, Q.Sátbaev ýnıversıteti tarıhı mýzeıiniń dırektory Jeńis Moldabekov.
