Sulýlyq pen rýhtyń úndesýi: Pavlodarda salt-dástúrdi nasıhattaıtyn kórme ótti
PAVLODAR. KAZINFORM - Pavlodarda Bagaev atyndaǵy mýzeı-úıinde fotosýretshi Aıgúl Tólegenovanyń ulttyq salt-dástúrimizdi nasıhattaýǵa baǵyttalǵan fotosýretter kórmesi ótti.
«Naýryz boıaýlary» atty kórmede kópshilik ulttyq estetıka týyndylarymen tanysty.
Bul kórme - jaı ǵana sýretter jıyntyǵy emes, bul qazaq kóshpeli órkenıetindegi áıel beınesin zertteýge arnalǵan kórkemdik joba. Avtordyń obektıvine ilingen dúnıelerden ulttyq kıimniń, sheksiz dalanyń jáne ata-babalar rýhynyń birtutas estetıkalyq kodqa aınalǵanyn baıqaýǵa bolady. Árbir portretti kórneki jyrǵa aınaldyryp, qazaq ulttyq kıimderiniń tereń sulýlyǵyn pash etedi.
- Ár sýretti adamdardyń boıynda qazaq mádenıetine qatysty jarqyn estelikter qalsa degen tilekpen túsiremin. «Kıiz úı» degen joba bastap, sońǵy tórt jylda qanshama jandy ulttyq salt-dástúrimizge jaqyndata túsken fotosýretterdi dúnıege ákeldim. Klıentterimniń arasynda ózge ulttyń adamdary barshylyq. Olar bul arqyly bizdiń ulttyq kıimimizdiń estetıkalyq ereksheligin tereńirek túsinip, elimizge degen súıispenshiligin bildirip jatady. Áshekeılerdi kóbirek qoldanamyn. Sonaý AQSh-tan, Eýropa elderinen kelip, arnaıy túsip ketkender qanshama, - deıdi Aıgúl Tólegenova.
Avtor etnostıli jańasha paıymdap, qazaqtyń ulttyq kıimin tek mýzeı eksponaty retinde emes, búgingi kúnniń sánine saı, jandy, ózekti mádenıet retinde kórsetedi. Bul qazirgi jastardy óz tamyrynan ajyramaýǵa, ulttyq jádigerlerdi maqtan tutýǵa shaqyratyn erekshe úndeý. Halqymyzdyń qońyr tirshiligine jaqyn tústerdiń qanyqtylyǵy men beınelerdiń shynaıylyǵy qazaqy bolmystyń tylsym álemine jeteleıdi.
Aıta óteıik, Aıgúldiń fotosýretteri elimizben qatar, Reseıde, Frantsııadaǵy kórmelerde usynylǵan.
Buǵan deıin Jylqy jylynyń mańyzy qandaı ekenin jazǵanbyz.
