«Sulý Syrdan – Uly Abaı eline»: Qyzylorda oblysynyń óner kúnderi Óskemende jalǵasty
QYZYLORDA. KAZINFORM – Abaıdyń 180 jyldyǵyna arnalǵan «Sulý Syrdan – uly Abaı eline» atty Qyzylorda oblysynyń óner kúnderi Óskemen qalasynda jalǵasyn tapty. Syrdyń boıynan Ertis jaǵasyna sapar shekken delegatsııany oblys ákimi Nurlybek Nálibaev bastap bardy.
Delegatsııa quramynda Parlament Senaty men Májilisiniń depýtattary N.Baıqadamov, R.Rústemov, M.Ergeshbaev, oblystyq ardagerler keńesiniń tóraǵasy S.Dúısenbaev, aımaq ardagerleri, zııaly qaýym ókilderi, Turmaǵambet atyndaǵy halyq aspaptar, sımfonııa orkestrleri, «Syr samaly» vokaldy-aspapty, «Tomırıs» bı ansamblderi, hor ujymy, basqa da ónerpazdar bar.
Shyǵys Qazaqstan oblystyq fılarmonııasyna jınalǵan kórermenge ónerpazdar án-jyrdan shashý shashty. Aımaq basshysy ult rýhanııaty men mádenıetiniń, ádebıeti men óneriniń qaınar bastaýyndaǵy tulǵalar túlegen Shyǵys jurtshylyǵyna izgi tilegin bildirdi.
– Óz zamanynan kósh ilgeri oılaıtyn Shákárim Qudaıberdiulynan «Syr – Alashtyń anasy» degen naqyl qalǵan. Qıly zamanda, zulmatqa toly kúnderde, aqtaban shubyryndy kezeńinde, el ishin asharshylyq jaılaǵanda búkil qazaq balasy kósh-kerýeniniń basyn Syrǵa buryp, Syrdy anasyndaı panalaǵan. Sol sebepti, Alashqa ana bolǵan Syrdyń qazaq úshin orny da, jóni de bólek.
Kúlli túrki áleminiń altyn besigi sanalatyn Altaı tórindegi shyraıly shyǵys ólkesi – túrkilerdiń sana-sezimin qalyptastyrǵan, rýhanı uıasynda talaı uly tulǵalar tárbıelengen qasıetti meken.
Yrys aýnap, qut qonǵan Shyǵys Qazaqstan – qazaq halqynyń jan-dúnıesiniń tereńdigin aıqyndaıtyn kıeli ólke.Shyńǵys taýynyń bókterinde uly Abaıdyń 180 jyldyǵy Prezıdentimizdiń qoldaýymen joǵary deńgeıde atap ótilýi de osynyń aıqyn dáleli. Memleket basshymyz «Uly Abaı – bizdiń elimizdiń maqtanyshy ǵana emes, álemdik deńgeıdegi kemeńger. Onyń óleńderi men qara sózderi – ulttyq bolmysymyzdyń aınasy» degen bolatyn. Barshańyzdy qazaqtyń birtýar uly aqyny, «adamzattyń Abaıy» atanǵan aǵartýshy, rýhanı reformator Abaı Qunanbaıulynyń jalpyhalyqtyq toıymen Syr jurtshylyǵynyń, Ózimniń atymnan shyn júrekten quttyqtaımyn, - dedi N.Nálibaev.
Merekelik basqosýda Shyǵys Qazaqstan oblysynyń ákimi Nurymbet Saqtaǵanov sóz sóılep, óner kúnderin ótkizýge qoldaý bildirgen oblys ákimi Nurlybek Nálibaevqa, atsalysqan ónerpazdarǵa alǵysyn jetkizdi.
Kontsertte Qorqyttyń saryny qylqobyzdan tógilip, «Kúltegin» jyrynyń úzindisi oryndaldy, kórermen qoshemetine ıe bolǵan «Qorqyt–qobyz» áni shyrqaldy.
«Uly dala poemasy» horeografııalyq qoıylymyn qoıǵan «Tomırıs» bı ansambline erekshe qurmet kórsetildi.
Syr súleıleriniń tolǵaýlaryna sýsaǵan kórermenge Nurtýǵan jyraýdyń «Ósıeti», Nartaı aqynnyń «Ózderiń biler Nartaımyn», Aq Kete Shernııazdyń «Sóz sóıleıin bólmelep» termeleri usynyldy. «Búldirgen», «Sursha qyz», «Syrdyń qaratorǵaıy», «Aýylyń seniń irgeli» sııaqty halyq ánderi, álemdik klassıkanyń jaýhar týyndylary oryndaldy.
Eske salaıyq, keshe «Sulý Syrdan – uly Abaı eline» atty Qyzylorda oblysynyń óner kúnderi Abaı oblysynda ótti.