Sultanov Úkimet basshysynyń synyna jaýap berdi
Otyrysta ol bıýdjet aqshasyn ýaqytynda ıgermeıtin oblystarǵa qosymsha qarajatty bólgeni úshin Úkimet basshysynyń synyna ushyraǵan bolatyn, dep xabarlaıdy QazAqparat tilshisi.
"Árıne, baqylaý jumysy jalǵasatyn bolady. Byltyr qalaı ıgerildi, kimde qandaı problema bar, nege ıgerilmedi, sonyń bárine taldaý jasap, kelesi jylǵy bıýdjetti taratqanda ondaı ákimdikterge qosymsha qarjyny bólmeımiz. Sóıtip, "Nurly jol" baǵdarlamasy aıasynda qarjy bólý júıesin qolma-qol basqaryp otyramyz. Bıýdjet qarjysyn ıgerýdi ekinshi jartyjyldyqqa qaldyrmaı, bárin bir jyldyń ishinde birkelki ıgerýdi qamtamasyz etýimiz kerek. Jalpy, qarjy ıgerý jaǵynan naqty kórsetkish bar. Ol - jumystyń nátıjesi. Ondaı kórsetkishke jetpegen organdardyń jeke jaýapkershiligi de qarastyrylǵan", - dedi Sultanov Úkimet otyrysynan keıingi baspasóz máslıxatynda.
Mınıstrdiń aıtýynsha, konkýrstardy ótkizý kezinde qarjylyq baqylaý sharalary bıýdjet aqshasyn ıgerýge tosqaýyl bolyp jatady. Sol sebepti búginde memlekettik aýdıt sııaqty kameraldyq baqylaýdyń arqasynda qarjylyq quqyq buzýshylyqtardyń aldyn alý jumysy júrgiziledi. "Osynyń nátıjesinde biz 55 mlrd. teńgeni quqyq buzýshylyqqa deıin jetkizbeı, konkýrstardyń ýaqytynda ári tártip buzýshylyqsyz ótýine jaǵdaı jasadyq. Degenmen, qarjylyq baqylaýdyń nátıjesi de joq emes. Máselen, ótken jyly 5 memlekettik qyzmetshi 500 myń teńge aıyppul tóledi. Budan bólek, 24 adam tártiptik jazaǵa tartyldy jáne bir adam jumystan qýyldy", - dep atap kórsetti qarjy mınıstri.
Aıta keteıik, Úkimettiń búgingi otyrysynda Premer-Mınıstr Baqytjan Saǵyntaev "Nurly jol" baǵdarlamasy aıasynda bıýdjet qarjysyn ýaqytynda ıgermegen oblys ákimderin bir "silkilep" aldy. Odan keıin, Qarjy mınıstri Baqyt Sultanovqa shúılikti. "Men túsinbeımin, texnıkalyq-ekonomıkalyq negizdemeni, jobalyq-smetalyq qujattarǵa ózgeris engizemiz dep, qurylys jumystaryn qalaı toqtatýǵa bolady? Baqyt Turlyxanuly, ondaı jobalarǵa qalaı aqsha bólýge bolady? Aqshany alyp alady da, túzetý jasaýǵa kirisedi. Prezıdent sizge eskertý jasady ǵoı. Qatań talap qoıyńyz!", - dedi Premer-Mınıstr. Baqyt Turlyxanuly "Qup bolady!" dep qysqa ǵana qaıyrdy.
