Sultanov mınıstrliktiń shtatyn qysqartýǵa qatysty óz oıyn bildirdi
ASTANA. QazAqparat - Jaqynda QR Memlekettik qyzmet isteri jáne sybaılas jemqorlyqqa qarsy kúres agenttiginiń keńeıtilgen májilisinde Prezıdent Ákimshiliginiń basshysy Ádilbek Jaqsybekov uzaq ýaqyt boıy bos oryndardy ustap, jumysqa adam almaı jatqan mınıstrlikterdi synǵa aldy. Osy oraıda ol birqatar memlekettik organdardyń shtatyn qysqartýdy usyndy. Búgin Úkimet otyrysynan keıin QazAqparat tilshisine suxbat bergen qarjy mınıstri Baqyt Sultanov osy usynysqa qatysty óz oıyn bildirdi.
Aıta keteıik, Á.Jaqsybekovtyń málimetine sáıkes, qarjy mınıstrliginde 970 qyzmet orny bos tursa, ulttyq ekonomıka mınıstrliginde - 900-den astam, al aýyl sharýashylyǵy mınıstrliginde 280 qyzmetke áli adam ala qoımaǵan. «Nege ol oryndar bos tur? Bálkim, sol mınıstrlikterdiń shtatyn qysqartamyz. Sonyń arqasynda biraz aqshany únemdeýge bolady», - dep atap kórsetti Prezıdent Ákimshiliginiń basshysy.
Qarjy mınıstri Baqyt Sultanovtyń aıtýynsha, ondaı vakansııalardy ustaǵanda jumys jaǵynan basqa qyzmetkerlerge salmaq túsedi. Alaıda mınıstrlik bos vakansııalardyń aqshasyn paıdalanyp, jumys istep jatqan qyzmetkerlerge syıaqy retinde bere alady. «Endi, júıeniń ózi (mınıstrliktiń shtaty - avt) úlken ǵoı, 15 myń adam bar. Árıne, mamandardyń kelip-ketýi jıi bolyp turady. Sebebi aımaqtarda jalaqynyń kólemi az», - deıdi B.Sultanov.
«Sonda mınıstrlikti qysqartý qajet pe?» degen suraqqa ol: «Endi, qazir bizde tıisti mindettemeler bar. Sonyń ishinde eksporttyq baqylaý, kedendik qadaǵalaý jáne taǵysyn taǵy. Búginde biz Memlekettik kirister komıtetiniń qyzmetin qaıta qarap, fýnktsııalaryn rettep jatyrmyz. Osy jumystyń nátıjesi boıynsha ońtaılandyrýdyń bar-joǵyn aıta alamyz. Biz ondaı taldaý únemi jasap otyramyz», - dep atap ótti mınıstr.
Onyń sózine qaraǵanda, atalǵan 970 bos jumys oryndarynyń ishinde qazirgi shtat birligimen qatar jańa ózgerister aıasyndaǵy qyzmetter de bar.
