Sultanmahmut Toraıǵyrovtyń 90 jyl buryn basylǵan jyr kitaby restavratsııadan ótti
PAVLODAR. KAZINFORM — Pavlodardaǵy Buqar jyraý atyndaǵy ádebıet jáne óner mýzeıinde Sultanmahmut Toraıǵyrovtyń osydan 90 jyl buryn latyn qarpinde shyqqan óleńder jınaǵy saqtaýly tur.
Qazaqtyń oıshyl aqynynyń sırek kezdesetin kitaby jýyqta restavratsııadan ótip, birneshe danada basyldy.
Bul kitap sonaý 2014 jyly mýzeı qyzmetkerleriniń kúsh-jigerimen Almatydan jetkizilgen.
Juldyzy erte sóngen aqynnyń sońynda eki roman, bes poema jáne kóptegen óleńi men ocherkteri qaldy.
1933 jyly Qyzylordadan latyn qarpinde basylyp shyqqan «Tolyq shyǵarmalar jınaǵy» dep atalatyn jınaqqa aqynnyń óleńderi, áńgimeleri jáne poemalary toptastyrylǵan.
Otty jyrlarymen Alashtyń aldaspanyna aınalǵan tulǵanyń shyǵarmalaryn Júsipbek Aımaýytov on jyldaı jınaqtap, alǵy sózin jazyp, baspaǵa tapsyrǵan. 1927 jylǵy 15 qarashada Alash arysynyń Máshhúr Júsipke jazǵan hatynda: «Sultanmahmut sózderin byltyr túgel jınap, úlken kitap qylyp, baspaǵa bergenmin. Odan basylady degen habar alyp otyrmyn…» delingen eken.
Alaıda sol tusta Júsekeńniń ózi «halyq jaýy» degen jalǵan jalamen ustalyp, atylyp ketken soń bul kitaptyń alǵysózin Sábıt Muqanov jazǵan.
Abaıtanýshy ǵalym Qaıym Muhamedjanov bir eńbeginde: «Júsipbek bolmasa Toraıǵyrovtyń tolyq jınaǵynyń shyǵýy, onyń tolyq ómir tarıhyn bilýimiz neǵaıbyl edi» — dep jazatyny da sodan.
— Bul jınaq Qazaqstannyń halyq aqyny Dıhan Ábilevtiń úıinde saqtalǵan eken. Almatyǵa barǵan saparymda Dıhan Ábilevtiń úıine arnaıy baryp, jerlesimizdiń osy eńbegin qolǵa túsirdim. Qazirgi kúni mýzeıdegi qundy jádigerlerdiń qataryn tolyqtyryp tur. Óleńder jınaǵy Almatynyń kitaphanalarynda bar-joǵyn bilmeımin. Biraq Pavlodardyń ózge mýzeılerinen de, kitaphanalarynan da tappaısyz, — deıdi mýzeı basshysy Erbol Qaıyrov.
Aıta ketelik kitaphanadaǵy ǵasyrlyq tarıhy bar kitaptar qalaı saqtalatyny týraly jazǵan edik.