Sultanǵalı Kenjequlov «KAZAKH INVEST» UK» AQ basqarma tóraǵasy bolyp taǵaıyndaldy

ASTANA. KAZINFORM — Dırektorlar keńesiniń sheshimimen Kenjequlov Sultanǵalı Qurmanǵalıuly «KAZAKH INVEST» UK» AQ basqarma tóraǵasy laýazymyna saılandy. Bul týraly «Kazakh Invest» Ulttyq kompanııasy» AQ baspasóz qyzmeti málim etti.

Sultanǵalı Kenjequlov 1982 jyly Almaty qalasynda dúnıege kelgen. Qazaq quqyqtaný jáne halyqaralyq qatynastar ınstıtýtyn, RF SІM Dıplomatııalyq akademııasyn támamdaǵan. Halyqaralyq qatynastar salasynyń mamany.

Eńbek jolyn 2003 jyly Qazaqstan Respýblıkasy Syrtqy ister mınıstrligi Konsýldyq qyzmet departamentiniń mamany bolyp bastaǵan.

2006–2016 jyldary — QR Syrtqy ister mınıstrligi Konsýldyq qyzmet departamentiniń attashesi, QR Qytaı Halyq Respýblıkasyndaǵy Elshiliginiń attashesi, úshinshi, ekinshi, birinshi hatshysy, QR SІM Azııa jáne Afrıka departamentiniń ekinshi hatshysy.

2016–2017 jyldary — QR Investıtsııalar jáne damý mınıstriniń ınvestıtsııa jónindegi arnaýly keńesshisi.

2017–2019 jyldary — «KAZAKH INVEST» UK» AQ Qytaı Halyq Respýblıkasyndaǵy ókili.

2019–2023 jyldary — QR SІM Azııa jáne Afrıka departamentiniń basqarma basshysy, QR Qytaı Halyq Respýblıkasyndaǵy Elshiliginiń saýda-ekonomıkalyq jáne ınvestıtsııalyq máseleler boıynsha keńesshisi.

2023 jyldan osy ýaqytqa deıin QR SІM Investıtsııa komıteti tóraǵasynyń orynbasary qyzmetin atqardy.

Aǵylshyn jáne qytaı tilderin meńgergen.

Eske sala keteıik, buǵan deıin Almaty ákiminiń jańa orynbasary taǵaıyndalǵan bolatyn.