Sultanbek Qojanovtyń shyǵarmalar jınaǵy jaryq kórdi
ALMATY. Mamyrdyń 27-si. QazAqparat /Erbol Turymbetov/ - Búgin QR Ulttyq kitaphanasynda kórnekti memleket jáne qoǵam qaıratkeri, pýblıtsıst, aqyn, aýdarmashy Sultanbek Qojanovtyń shyǵarmalary jınaǵynyń tusaýkeseri ótti,
dep habarlaıdy QazAqparat.
Ony Ulttyq kitaphana men S. Qojanov atyndaǵy qaıyrymdylyq qory saıası qýǵyn-súrgin qurbandaryn eske alý kúnine oraı uıymdastyrdy. Jınaq «Alash murasy» serııasymen «Arys» baspasynan jaryq kórgen. Kitaptyń qurastyrýshysy fılologııa ǵylymdarynyń doktory, professor Amantaı Shárip.
Kórnekti memleket jáne qoǵam qaıratkeri, pýblıtsıst, aqyn, aýdarmashy, ádebıettanýshy, aǵartýshy-ustaz Sultanbek Qojanovtyń bul jınaǵyna ár jyldary jazylǵan túrli taqyryptaǵy maqalalary, óleńderi men aýdarmalary engizilgen. Sonymen qatar, jınaqta «Túrkistan avtonomııasynyń 10 jyldyǵyna» atty zertteý eńbegi jáne tar qapastaǵy tergeý hattamasy berilgen.
Sultanbek Qojanov - 1917 jylǵy revolıýtsııalarda jarqyraı kóringen Orta Azııa men Qazaqstan tarıhyndaǵy kórnekti tulǵalardyń biri. Túrkistan Respýblıkasy men Qazaq Respýblıkasynyń joǵary basshylyǵynda ult múddesi úshin belsendi atsalysqan. Partııa-keńes jumystarynda jaýapty qyzmetter atqaryp, Qazaq ólkelik Komıtetiniń hatshysy boldy. Matematıkadan qazaq tilindegi alǵashqy oqýlyqtardyń avtory. Stalındik qýǵynǵa ushyrap, 1938 jyldyń 10 aqpanynda atý jazasyna kesildi. Keıin 1957 jyly aqtaldy.
«Sultanbek Qojanov Túrkistan qazaqtarynyń Qazaq Avtonomııasyna qosylýyna mol eńbek sińirgen. Ásirese qazaq zııalylarynyń birligi úshin kóp ter tókken.Tarıhı tulǵanyń jazbasha murasy osy kitapta tuńǵysh ret toptastyrylyp otyr. Osyndaı aqtańdaqtarymyzdy ulaǵattap otyrý eldigimiz úshin óte mańyzdy» - dedi jıynǵa qatysýshy fılologııa ǵylymdarynyń doktory, professor T. Kákishev.
Otyrystan soń oqyrmandar úshin kitaphana qorynan S. Qojanovqa arnalǵan kitap kórmesi uıymdastyrylǵan.
