Sultan Záýirbek erteń kezekti jekpe-jegin ótkizedi

ASTANA. QazAqparat – Qazaqstandyq kásipqoı boksshy Sultan Záýirbektiń (13-0, 9KO) kelesi jekpe-jeginiń datasy anyqtaldy, dep habarlaıdy QazAqparat áleýmettik jelidegi kazproboxing paraqshasyna silteme jasap.

Záýirbektiń jekpe-jegi 24 naýryzda Ulybrıtanııanyń Bolton qalasynda ótedi. Qarsylasy – argentınalyq Fakýndo Arse (15-9-2, 7KO).
Boksshylar kezdesý aldynda salmaq ólsheý rásiminen ótti. Qazaqstandyq boksshynyń salmaǵy jartylaı jeńil aýyrlyq sanatyndaǵy lımıtten asqan joq.

Aıta keteıik, Záýirbek pen Arse rıngke Boltondaǵy boks keshiniń anderkardynda shyǵady. Basty jekpe-jekte brıtandyq Laındon Artýr (21-1, 15KO) men argentınalyq Braıan Sýares (18-1, 17KO) IBO-nyń jartylaı aýyr salmaqtaǵy álem chempıony tıtýlyn sarapqa salady.

Eske salaıyq, bıylǵy 19 aqpanda Dúnıejúzilik boks uıymy (WBO) barlyq salmaq sanaty boıynsha jańartylǵan reıtıngini jarııalady. Oǵan sáıkes, Sultan Záýirbek 11-den 10-orynǵa kóterildi.