Sultan Sarsemalıevtiń sottaǵy kúlkisi jaza taǵaıyndaý kezinde eskerildi
ATYRAÝ. KAZINFORM — Atyraýda tórt adamdy óltirgeni úshin ómir boıyna bas bostandyǵynan aıyrylǵan Sultan Sarsemalıevtiń sot protsesi kezindegi minez-qulqy jaza taǵaıyndaý barysynda eskerilgen.
Qylmystyq ister jónindegi mamandandyrylǵan aýdanaralyq sottyń sýdıasy Zarema Hamıdýllına úkimdi túsindirý kezinde aıyptalýshynyń sot otyrystary barysynda jábirlenýshi taraptyń sózderine kúlip otyrǵanyn atap ótti.
— Sarsemalıev, siz protsess barysynda jáne qazirdiń ózinde kúlkińizdi jııa almaı otyrsyz. Minez-qulqyńyzdy sot tolyq eskerdi. Jábirlenýshi taraptyń sózderine kúlip otyrǵanyńyzǵa sot jaza taǵaıyndaý kezinde baǵa berip, eskerdi, — dedi sýdıa.
Sýdıanyń aıtýynsha, bul qylmys tek jábirlenýshilerdiń otbasyna emes, búkil qoǵamǵa aýyr moraldyq soqqy bolǵan.
— Qandaı da bir ashý orny tolmas qaıǵyǵa ákelýi múmkin. Bir otbasyn tolyqqandy qasaqana qazaǵa ushyratý — qoǵamǵa jasalǵan moraldyq aýyr soqqy. Qoǵam arasynda úreı qalyptasty, — dedi Zarema Hamıdýllına.
Eske salaıyq, búgin, 2026 jylǵy 14 shildede qoǵamdy dúr silkindirgen qandy qylmysqa núkte qoıyldy. Sultan Sarsemalıevtiń kinási tolyq dáleldenip, ol ómir boıyna sottaldy.
