Sultan Sarsemalıevtiń qaıyn atasy men enesin qalaı óltirgeni belgili boldy
ATYRAÝ.KAZINFORM — Atyraý oblysy Jangeldın aýylynda bútin bir otbasynyń ólimine qatysty Sultan Sarsemalıevke qatysty sot otyrysynda prokýror qylmystyń qalaı bolǵanyn aıtyp jatyr.
Atyraý oblystyq prokýratýrasynyń prokýrory Mıras Baýyrjanovtyń aıtýynsha, Sultan Sarsemalıev áıeliniń inisi Naýryz Muqanǵalıevti ótken jyldyń naýryz aýynda Atyraýdyń Munaıshy shaǵynaýdanyndaǵy óz úıinde óltirip, keıin atynan arnaıy qosymsha arqyly 4 mln teńge nesıe alǵan.
Birneshe kúnnen keıin Naýryzdyń telefonyndaǵy What’s App qosymshasy arqyly Násip Óteshqalıevadan 350 myń teńge surap, jazyp jibergen. Aqshany Qyzylqoǵa men Atyraý qalasynda taksı qyzmetin kórsetetin azamat arqyly alǵan. Taksı júrgizýshisi qalaǵa kelgennen keıin aqshany termınal arqyly Naýryz Muqanǵalıevtiń nómirine salyp jibergen.
2025 jyldyń qarasha aıynda Sultan Sarsemalıev áıeli men bir qyzyn alyp, Qyzylqoǵa aýdanyndaǵy Jangeldın aýylyna qonaqqa barady. Sol kezde otbasy músheleriniń arasynda janjal týyndaǵan.
Kúdikti úı aýlasyndaǵy saraıda úı sharýasyn istep júrgen Násip Óteshqalıevany baıqap, birinshi ony pyshaqtap óltiredi. Keıin qaıyn atasyn da jaraqattap, saraıǵa kómgen.
Aıta keteıik, protsess ashyq formatta ótip jatyr.
Qylmystyq iske Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zarema Hamıdýllına tórelik etýde.
Atyshýly isti aqparattandyrý úshin ózge óńirlerden BAQ ókilderi arnaıy kelgen.
Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Buǵan deıin marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Aqpan aıynyń basynda kúdiktiń 5 balasy memleket qamqorlyǵyna alyndy.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Keıin eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.
Sot medıtsınalyq saraptamasynda jáne tergeý barysynda anyqtalǵan dálelderge sáıkes Naýryz Muqanǵalıevtiń 2025 jyldyń mamyr aıynda qaıtys bolǵany anyqtaldy. Al qalǵan úsheýi qarasha aıynda kóz jumǵan.
